El Bancu d’Alimentos d’Asturies ye una organización ensin ánimu de llucru xestionada dafechu por voluntarios que llucha contra la fame y la malnutrición n’Asturies. L’aumentu de necesidaes, el fin de les ayudes d’alimentos del plan FEAD y una cayía del 20% nes donaciones faen qu’esta organización, que suple dende’l voluntariau un llabor que’l gobiernu d’Asturies desatiende, vea imposible cubrir esti añu los sos oxetivos.

Cubrir les necesidaes más básiques de la población más desfavorecio d’Asturies tendría de ser llabor de los servicios sociales del Principado. Sicasí, l’añu pasáu 14.000 families d’ asturianos dependieron del Bancu d’Alimentos pa sosistir, recibiendo una media de 300 gramos d’alimentu por persona y día.

Esti añu, anuncien, la cobertura va tener que reducise, ya que la cabera recoyía d’alimentos nun algamó esti mayu l’oxetivu previstu de 150.000 kilos d’alimentos, colos que cubriríen les necesidaes percibíes pa esti añu, quedando nos 118.000, un 21,3% perbaxo, una cantidá que nun algama pa cubrir les necesidaes de la xente qu’acude a ellos a la gueta d’una alimentación afayaiza.

Poro, sorrayen que «la situación actual ye mui complicada» y alvierten de que, “si nun se tomen otru tipu de midies, va ser mui difícil siguir prestando la ayuda alimentaria añal”.

Recuerden tamién qu’esti añu nun se recibirá l’aporte del Plan FEAD, que n’años anteriores algamaba cantidaes cercanes a los 600.000 kilos, al finar esti programa europeu d’ayuda alimentaria.

Llucía F. Marqués