Los ganaderos de la zona de los Llagos de Cuadonga nun son a pescanciar por qué tienen d’esperar hasta dos hores al pie de la carretera pa facer el so trabayu. Un trabayu, amás, venceyáu al bientar d’unos animales qu’importen menos entá que los propios ganaderos, unos y otros habitantes de segunda na so propia tierra.

¿Imaxíneste qu’al llegar al trabayu te dicen que si quies dir a por esa fotocopia imprescindible pa seguir trabayando ties qu’esperar a que pasen dos hores, llantáu metanes el pasiellu, dexar que pasen delantre de tí un grupu de turistes cámara en man y que lluéu ya, si eso, pues usar la fotocopiadora? ¿Imaxíneste un camareru que tea d’esperar a que pasen los guies turísticos pa poder acceder a la xelera? ¿Non? Pues al Principado que los ganaderos esperen hasta dos hores p’averase al so trabayu abúltai de lo más normal.

Les midíes del nuevu Plan de Transporte de los Llagos, orquestáu dende’l Principado ensin consultar siquiera a los vecinos afeutaos, inclui esti añu una nueva midía que complica, un pocu más, el ya difícil llabor de los ganaderos de Cuadonga. El preslle de la barrera de subida abriráse namás en función de los ALSA qu’acarreten a los visitantes y namás depués de que pasen los autobuses podrán dir, formalinos tres d’ellos, los trabayadores. Ello pue implicar esperes de fasta dos hores a pie de carretera, tiempu perdíu en que’l ganao tará ensin atender ya’l llabor ensin facer. 

“Nun mos quien equí. Too ta prohibio” protesten los pocos ganaderos qu’entá nun se rinden. Y tienen razón, el so oficiu tien un enemigu muncho más duru que’l llobu: una alministración pa la que son un estorbu, o como muncho, un adornu más nel parque temáticu nel que tan convirtiendo Asturies. 

Llucía Fernández

This work is licensed under a Creative Commons Attribution 4.0 International License.