Na mesma cita presentaráse’l llibru “No me gusta como hablas”, de la gallega María Méndez Santos.

L’autora del llibru “No me gusta como hablas”, va tar presente esti 29 de xunu nel Espaciu de Cuatro Gotes pa participar nuna charra crucial sobre la discriminación llingüística xunto a Inaciu Galán. Esta intervención promete abrir un alderique necesariu sobre la diversidá llingüística y cultural nel estáu español, afrontando los prexuicios y desafíos qu’enfrenten les llingües.

La charra va llevase a cabu esti sábado 29 de xunu a les 12:00 hores nel espaciu Cuatro Gotes de Xixón. Na so intervención, María Méndez Santos va aldericar sobre los temes esploraos nel so llibru y va compartir la so perspectiva sobre la discriminación llingüística. 

Esti alcuentru forma parte de les diverses actividaes que se desenvuelven dientro del programa d’Afinidaes electives del Ministeriu de Cultura, que yá va pola so quinta edición. El programa cuenta con actividaes repartíes per tol territoriu y que se celebren ente’l 21 de xunu y el 20 d’ochobre. 

Amás, María va presentar el so llibru nuevu “No me gusta como hablas (o más bien no me gustas tú)”, una obra que pon de manifiestu la contina discriminación llingüística na nuesa sociedá y los prexuicios qu’entá moldeen les actitúes hacia delles formes de falar y llingües. Nesti llibru, l’autora esplora cómo la llingua se convierte nun marcador d’identidá y un campu de batalla social y cómo estes dinámiques afecten a les persones na so vida diaria. 

María Méndez Santos ye llicenciada en Filoloxía Hispánica y doctora en Llingua española pola Universidá de Vigo, exerció como docente n’universidaes en Rumanía, Ucraína, Armenia y estáu español. Les sos investigaciones céntrense na morfoloxía del español, la sociollingüística y la enseñanza d’idiomes. 

Inaciu Galán ye escritor, periodista, profesor y activista na defensa del asturianu. Doctor cum laude pola Universidá d’Uviéu, diplomáu en Turismu y graduáu en Periodismu, asina como Máster en Sociedá de la Comunicación pola Universitat Oberta de Catalunya. 

L’alcuentru ye una oportunidá d’escuchar de primer man les sos opiniones sobre la discriminación llingüística pa reflexonar sobre la importancia de la diversidá llingüística y cultural nel estáu español.

Susana Sela