Na llinia de privatización de servicios que tendríen d’atendese dende lo público, el Principado anuncia un sistema de conciertos a preciu fixu coles empreses privaes d’atención xeriátrica a un preciu de más del duple de lo que se vien pagando
El nuevu pactu del Principado coles empreses xeriátriques privaes afitaría un preciu fixu por plaza qu’implicaría una xubía de los 47 euros por persona y día a un mínimu de 72, pagaeros a empreses privaes pa que presten un serviciu ca vuelta más imprescindible y que’l Principado nun ye quien a asumir. Esa ye la cifra manexada nes negociacines por Leo Díaz, presidente de la patronal xeriátrica llíder en places concertaes, que ya alertó de la renuncia de los empresarios a algamar un alcuerdu de conciertu si el Principado nun aceuta esa xubía de mas del 55%.
Esti sistema finaría col procedimientu de subasta de places en función del preciu, pero nun dexa claro como se decidirá a qué empreses nin baxo qué criterios van concedese los conciertos nel futuru, dexando abiertu un ampliu campu al clientelarismu y a los amiguismos, tan tradicionales na política asturiana.
Col 28% de la población asturiana mayor de 65 años, el presupuestu destináu esti añu a qu’Establecimientos Residenciales pa Ancianos (ERA) xestione tola rede xeriátrica pública y concertada ye de 193,9 millones, colos que se xestionen un total de 13.000 places xeriátriques, sumando públiques y privaes, nidiamente insuficientes pa cubrir les necesidaes actuales.
![](https://www.infoasturies.com/wp-content/uploads/2020/01/banner-INFOASTURIES.jpg)
This work is licensed under a Creative Commons Attribution 4.0 International License.