El Principado publica güei nel Bopa el plan de xestión pa la estracción d’algues Gelidium o “ocle” pa la campaña 2024, autorizando l’arranque ensin control
L’aprovechamientu de la ocla ye tradicional en Asturies. El problema llega cuando, en llugar d’aprovechar lo que llega a la sablera de forma natural pa recoyelo ellí per medios manuales, se permite’l sistema d’arranque, una técnica d’aprovechamientu de recursos muncho más agresiva. Les praderíes d’algues constitúin hábitats marinos de gran valor, son zones d’asentamientu llarval y abelugos para diversos invertebraos, polo que resulten esenciales para la crecedera y desenvolvimientu de los pexes na so primer etapa.
La plataforma costera asturiana sufre una significativu amenorgamientu de la biomasa forestal marina, debida en parte al cambéu climáticu, que s’agrava notablemente col arranque d’ocle, en cuantes que nun ye un métodu selectivu.
El Principado acaba d’anunciar que, faciendo casu omiso a los allegamientos presentaos pola Coordinadora Ecoloxista ya incumpliendo el compromisu con el pescadores d’arribazón, dexa que los 20 barcos de la zona central pesquen na zona Oriental de Llanes, xuntu colos 8 barcos de la zona que tamién tán autorizaos, y non solo nun se retrasa l’arranque al 1 d’agostu como se solicitara sinón que se caltien la fecha d’entamu del 1 de xunetu, ampliando’l plazu al 31 de setiembre y non el 31 d’agostu como se proponía.
Les estracciones d’ocle tán llevándose a cabu ensin la realización d’estudios previos, ensin la ordenación d’árees d’esplotación gradual so control, ensin siguimientu sobro los impactos negativos que se tán causando y ensin atender a la capacidá de caltenimientu nin a la rexeneración de los campos d’ocle. Asina, dempués de 7 temporaes d’arranque d’ocla nel Oriente empezar a notar claramente’l descensu del mesmu.
Los ecoloxistes denuncien que tampocu nun se tomen midíes pal control eficaz y real de los cupos d’arranque, 1.300 tonelaes na zona Oriental y 3.300 tonelaes nel restu, nun se controla l’orixe del Gelidium mercáu poles fábriques, pa determinar si l’alga provien de barcos o del arribazón nin s’establecen sistemes de rotación por que les estracciones resulten más respetuoses coles dinámiques y comportamientos biolóxicos, climatolóxicos y ambientales.
Susana Sela
This work is licensed under a Creative Commons Attribution 4.0 International License.
