Lo primordial ya urxente ye frenar la emigración propio, calteniendo la mocedá nel país con condiciones llaborales y de vida dignes que permitan, amás, plantegase la creación d’una familia.

Pesi a la inmigración, la población asturiana va amenorgar nos próximos quince años de 1.008.874 a 967.328 habitantes; esta va ser la cayía d’habitantes más alta de too l’estáu, onde de fechu xube la población, según revelen les proyecciones realizaes pol Institutu Nacional d’Estadística (INE).

D’alcuerdu a estes proyecciones, Asturies rexistraría ente los años 2024 y 2039 una xabaz perda de moraores, tanto en términos absolutos, 41.546, como relativos, un 4,1%.

Nel mesmu periodu, el tamañu mediu de los llares asturianos baxaría hasta les 2,02 persones, con una fuerte medría de los llares unipersonales, un 40,5%, y les pareyes ensin fíos. Tamién nesti aspeutu destaca Asturies perbaxo del restu de territorios del estáu.

Los datos son especialmente graves pola continuidá d’esti enclín a lo llargo de décades y pola ausencia de midíes que frenen esta caida, más allá d’atraer población estranxera flotante col turismu o tratar d’atraer con engaños a nómades dixitales” qu’una vegada comprueben la falta de servicios de los pueblos asturianos vuelven dise. 

La inmigración nun ye abondo comu solución y amás la falta de mocedá autóctona dificulta la integración y xenera una perda cultural ya identitaria fuerte. Lo primordial ya urxente ye frenar la emigración propio, calteniendo la mocedá nel país con condiciones llaborales y de vida dignes que permitan, amás, plantegase la creación d’una familia. 

Les consecuencies de la perda y avieyamientu de la población afeuta a qu’hai munches otres cuestiones, sociales -solitú de los mayores, perda identitaria- económiques -pensiones, necesidá de gastu en salú, falta de man d’obra cualificao- y políticos -perda de pesu demográficu y representatividá política-

Alberto Rodríguez