Visita Xixón presentó la candidatura p’acoyer la V Convención Turespaña n’ochobre del añu qu’entra
Xixón busca ser la see de la Convención de Turespaña, organismu autónomu adscritu al Ministeriu d’ Industria, Comerciu y Turismu, al traviés de la Secretaría d’Estáu de Turismu.
Trátase d’un eventu añal concebíu como un espaciu pal alcuentru del sector turísticu, públicu y priváu, pal intercambiu d’información y bones práctiques,asina comu pa la reflexón conxunta alrodiu al desenvolvimientu turísticu del estáu, los sos destinos y empreses.
Los oxetivos de la Convención son identificar ya introducir nel alderique públicu los elementos más relevantes nel sector del turismu, nacional ya internacional, lliderar l’alderique sobro los principales retos del turismu, dar a conocer ya intercambiar bones práctiques, reforzar los mecanismos de collaboración pa la planificación del marketing turísticu, conocer enclinos o iniciatives del sector turísticu priváu y crear un espaciu d’alcuentru, collaboración y planificación.
Como ciudá anfitriona, Xixón algamaría una mayor visibilidá ente los profesionales del sector. Reforciaría la so imaxe de marca a gracies a l’espardimientu de la Convención ente los medios de comunicación especializaos. Coles mesmes, sedría una oportunidá única pa los profesionales llocales del sector de conocer el funcionamientu de Turespaña, ensin escaecer l’impactu económicu del eventu na ciudá, qu’espera xunta a más de 600 profesionales demientres trés xornaes.
El plazu de recepción de candidatures preslló’l 28 de xunu y primero que remate xunetu anunciará la ciudá anfitriona.
Llucía F. Marqués
This work is licensed under a Creative Commons Attribution 4.0 International License.
