El reciente esitu de la movilización vecinal al aparar la Planta de Pirólisis de Preco nel Puertu Xixón ye un precedente esperanzador que rescampla la importancia de los movimientos vecinales a la d’aparar aberraciones como estes, que busquen el beneficiu económicu a espenses de la salú de los vecinos.
Los vecinos pretenden baltar l’autorización ambiental concedía pola Conseyería de Transición Ecolóxica del Principado pa qu’Hunosa proceda a la tresformación de la planta, qu’actualmente sigue quemando carbón. Nun ye coherente, dicen, nin admisible que se forciare’l preslle de la minería p’actuar contra el calentamientu global y al tiempu se permita una práctica industrial tósica, qu’atenta gravemente contra la salú ya’l mediuambiente
La campaña de recoyía de perres pa llevar al Tribunal Superior de Xusticia d’Asturies (TSXA) consiguió ya, en malpenes dos meses y gracies a la donación de 198 persones y entidaes, un total de cuasi 9.000 euros, de los 10.000 que calculen que yos costará’l procesu completu. Ello permíte-yos aniciar darréu les aiciones xudiciales contra la trasformación de la térmica de La Pereda nuna central que queme biomasa conxuntamente con combustible sólidu recuperáu (CSR), ellaboráu de magar basoria.
La plataforma ta agora a la espera de que’l Xulgáu tresllade tolos expedientes pa proseguir col contenciosu-alministrativu ante los tribunales. El frente contra el CSR afita qu’esgotará toles víes xudiciales que tenga al so algame pa torgar que s’amburen basories en La Pereda.
La incineración de combustible CSR en Mieres xeneraría contaminación ambiental nun ampliu radiu de kilómetros, emitiendo sustancies altamente tósiques como diosines, furanos y metales pesaos.
Nel Dos Santos
This work is licensed under a Creative Commons Attribution 4.0 International License.
