La falta de previsión y organización de la conseyería de Mediu Rural, que nun cuenta con personal pa facer la vacunación, imposibilita que los ganaderos cumplan colos plazos que la mesma alministración yos impón.
Les organizaciones d’agricultores y ganaeros señalen que nueve meses depués entá nun se finó cola vacunación del ganau pol andanciu de la llingua azul.
El ritmu de vacunación contra la enfermedá de la llingua azul tenía de tar finada el mes de marzu. Sicasí, son munchos los animales -tanto vaques comu oveyes- que continúen siendo susceptibles de garrar esta pelligrosa malura de calter víricu y que se pega peles picaures de los mosquitos, ya que entá nestes feches son delles les ganaderíes que nun pudieron finar cola pauta completa de vacunación.
Los ganaderos acusen a la Conseyería de Mediu Rural pola so falta de previsión, señalando que l’andanciu xestionóse de manera improvisada, non sistemática, y que nun taben preparaos p’afrontar una crisis sanitaria d’esta triba. Consideran especialmente “insuficiente” la rempuesta de la Direición Xeneral de Ganadería y Sanidá sobre la vacunación de xatos de más de tres meses, que nun se fadrá fasta que fine la d’animales adultos, lo que complica la so venta a los ganaderos y los obliga a seguir atendiéndolos ensin saber si los van poder vender a tiempu.
Por tou ello soliciten que se tomen midíes darréu pa torgar la situación. Como mínimo, señalen, ye precisa la prórroga fasta’l 30 de xunetu na obligatoriedá de la vacunación, ya que si l’alministración nun pon medios pa ello ye imposible pa los ganaderos cumplir colos plazos. Una solución sedría, apunten, la contratación de más personal, aparte d’implementar un protocolu de reclamación polos efeutos secundarios de la vacuna.
Alberto Rodríguez
This work is licensed under a Creative Commons Attribution 4.0 International License.
