Llucía Fernández: “El compromisu asturianu y antifacista d’Andecha Astur nun mos permite quedar callaos ante lo que consideramos unos fechos inadmisibles”

El pasáu vienres 28 de xunu el monumentu dedicáu a los “Héroes de Simancas”, en Xixón, foi escenariu d’una concentración de nidiu calter facista, na que un bon garrapiellu de persones canciaron el Cara al Sol col brazu n’alto, realizando’l saludu facista. Los fechos foron xubios a redes polos propios participantes nel actu y nellos queda claro que nun hebio dala intervención policial nin identificación de los asistentes. 

Dende Andecha Astur entienden qu’estos actos son costitutivos d’un delitu d’odiu y contrarios a la Llei de la Memoria Hestórica y que de denguna manera pueden permanecer impunes, polo que vienen d’unviar un escritu solicitando a Fiscalía qu’investigue la so llegalidá y s’actúe en consecuencia.

Asina mesmo, remitieron al consistoriu xixonés una riestra d’entrugues pa certificar si dende la Ca Conceyu se tenía conocimientu de la convocatoria d’esti actu y si esti cuntaba con dalgún tipu de permisu o autorización pa la so realización.

Llucía Fernández, vocera d’Andecha Astur, declaró que “Ye impensable qu’agora mesmo n’Asturies tengamos que soportar actos facistes comu estos. La impunidá cola que campa la estrema drecha española nes nueses casi va pareya a la represión que carecen quienes defenden los drechos del pueblu asturianu, comu pue comprebase nel casu de les Seis de La Suiza”. Tamién afeó el silenciu cómpliz del Conceyu Xixón y del Principado y más en concreto, de tolos partios que se dicen democráticos y que nun gutiaron. “El compromisu asturianu y antifacista d’Andecha Astur nun mos permite quedar callaos” recalcó Fernández.

 Nel Dos Santos

This work is licensed under a Creative Commons Attribution 4.0 International License.