Fracasen los recursos interpuestos contra la sentencia dictada en payares del 21 que condergaba a UGT y a seis miembros de la so antigua cúpula por fraude na xestión de sovenciones pal emplegu
L’Audiencia Provincial vien de ratificar les condergues impuestes a la UGT y la so antigua cúpula, rebaxando namás la pena a l’alministradora de dos mercantiles implicaes, que pasa de 30 a 24 meses. El resto, incluyendo l’ex secretariu xeneral d’UGT, Justo Rodríguez Braga, caltendrán les sos sanciones por sacar provechu illicitamente de sovenciones destinaes a la realización de programes de formación pal emplegu, que se desviaben a entidaes privaes, como IFES, Foro Astur de Formación, Fundación Metal o la FLC, pente otres.
El sindicatu pagará una multa de 122.000 euros y la tará imposibilitáu p’algamar ayudes públiques o gociar d’incentivos fiscales durante cuatro años.
La sentencia agora confirmada consideró probao que dellos integrantes de la cúpula sindical desviaben fondos de les sovenciones concedies al sindicatu pol SEPEPA pa cursos de formación nos años 2011 y 2012, algamando importantes beneficios económicos que desviaron a UGT Asturies ya l’Istitutu de Formación y Estudios Sociales (IFES).
Pal desvíu d’estos fondos cuntaron amás col sofitu de l’administradora llegal de les empreses Formación 2020 y Localmur, quien agabitaba a enmascarar los costes riales d’execución de les aiciones formatives, desviando fondos pol métodu de xustificar sistemáticamente gastos mui perriba de los vraeros, inflando los precios de llocales, materiales y equipos, o incluso facturando equipos de los que nun consta siquiera esistencia. Tamién se facturaba a cargu de los cursos de formación gastos de personal llaboral del sindicatu ensin venceyu dalu coles aiciones formatives oxetu de les sovenciones.
Ye destacable la conderga al exsecretariu d’UGT Asturies, Justo Rodríguez Braga, al que se-y impón una pena de dos años y diez meses de prisión más el pagu de 586.000 euros en multes.
Un capítulu más del estensu hestorial mafiosu d’UGT Asturies.
Nel Dos Santos
This work is licensed under a Creative Commons Attribution 4.0 International License.
