Mientres toa Europa refuga la incineración como métodu de tratamientu de residuos, el Principado entama escursiones pa convencenos de que son una solución de futuru.
El Gobiernu d’Asturies entama una nueva visita a incineradores pa convencer de la so bondá a empresarios, sindicatos y vecinos. Esta vegada, el primer destín ye la incineradora de Zubieta, al par de San Sebastián.
La incineradora de Zubieta, la cabera costruyía nel estáu, acumula abondes denuncies por mor de les irregularidaes na so costrucción y furrulamientu. Enfrentó una fuerte oposición de vecinos, grupos ecoloxistes y partios políticos -incluyios los que nos la quieren vender p’Asturies-. Actualmente ta sometía a investigaciones xudiciales sobre la xestión de residuos peligrosos qu’impliquen a altos cargos políticos, los graves incumplimientos de la normativa sobro contaminación y les denuncies d’arramaos illegales por parte de GuraSOS.
La iniciativa d’esta visita nun provien de Cogersa, comu yera vezu, sinon de la mesma Conseyería d’Ordenación del Territoriu, Urbanismu, Vivienda y Drechos Ciudadanos. Esta Conseyería, baxo la dirección de Izquierda Unida-Convocatoria por Asturies, promueve agora la incineradora como una referencia na xestión de residuos, pesi a que la so homóloga n’Euskadi sopúsose firmemente a la costrucción de la mesma.
Izquierda Unida, promotora de la coalición denominada Convocatoria por Asturies, llevaba nel so programa ellectoral pa les elleiciones de Mayu de 2023 la desapaición de la incineración de plásticos y otres basories, faciendo una referencia espresa a que’l CSR nun yera una opción viable nel marcu de la política ambiental. Agora, incumpliendo el so programa, defende les bondaes ambientales de la quema del CSR na térmica de Mieres y plantega una nueva incineradora pública en Xixón.
Asturies alcuéntrase a la cola del reciclaxe n’Europa, con un escasu 23%, mui perbaxo del 55% deseyable. El gobiernu insiste na quema en llugar de priorizar la Redución, Reutilización y Reciclax. Asturies tien un altísimu índiz de contaminación del aire por partícules PM10, partícules microscópiques, compuestes principalmente por materiales inorgánicos y metales pesaos asociaes a problemes de salú como EPOC, ictus y cáncanu, afectando negativamente la esperanza de vida, pero el Principado pretende añadir más fuentes de contaminación.
Delles organizaciones y partios manifestaron ya la so disconformidá con esti intentu del Principado de “colanos” la incineradora con estes escursiones pagues “qu’insulten la nuesa intelixencia”.
Asociación Geotrupes
Asociación Medioambiental La Cirigüeña
Asociación Asturiana de Amigos de la Naturaleza
Andecha Astur
Asociación Molin de Adela
Asociación Ereba, Ecología y Patrimonio
Aina Asturies
Colectivu Ecoloxista d’Avilés
Coordinadora Ornitoloxica d’Asturies
Grupu Parlamentariu Mistu
Plataforma Antitermica de la Pereda
Podemos
SOS Cuideiru
Verdes-Equo
Susana Sela
This work is licensed under a Creative Commons Attribution 4.0 International License.
