La oposición cuasi al completu -cola esceición del PP- abandonó la sala depués de que l’alcaldesa, Carmen Moriyón, tratare de disculpar comu erru contable el desvíu de más de 31.000 euros a beneficiu del so partíu
La discusión del plenu cientróse na sentencia del Tribunal de Cuentes qu’obligó a l’alcaldesa de Xixón a reintegrar nes arques municipales 31.000 euros más intereses (en total, 35.000) por dellos gastos realizados ente los años 2017 y 2019 con cargu a les aportaciones del Conceyu al grupu municipal de Foro. Estos gastos incluyíen pagu de pleitos particulares, sobresueldos y gastos en fartures. Estos gastos sucediéronse demientres tres años, lo que resta credibilidá a les esculpies de Moriyón que quiso reducir la cuestión a “un erru contable”.
Durante la so comparecencia l’alcaldesa, lloñe de reconocer los fechos, dar esculpies o desplicaciones al usu fraudulentu de más de 31.000 euros de dineru públicu -ya devueltos por Foro a les arques comunes- decidió facese la víctima y atacar con acusaciones al restu de partios, dando a entender que les cuentes de los demás tampocu tan llimpies, argumentu que de denguna manera eliminaría la so culpabilidá.
De fechu, si les cuentes de tolos partios nun tan a dimposición de tola ciudadanía na páxina web del Conceyu ye pola oposición de la conceyalía de Facienda, ya que ye una demanda llargamente fecha por dellos partios de la corporación municipal.
Depués de la falta de rempuesta de Moriyón, los representantes de PSOE, Podemos, IU y VOX abandonaron la sala, desixendo la dimisión de l’alcaldesa.
Nel Dos Santos
This work is licensed under a Creative Commons Attribution 4.0 International License.
