Dos dies depués de facer un brindis al sol presumiendo de salvar les comunicaciones d’Asturies, la realidá retruca a Barbón: el Ministru de Tresportes lleva-y la contraria ya’l tren-panacea estrópiase dexando más de cincu hores de retrasu

La solución de Barbón pa iguar les comunicaciones asturianes pasa por roblar “una alianza” con na menos que 50 puntos de cuestiones a iguar

El miércoles Adrián Barbón prometía “una nueva era” nes infracadarmes de comunicación n’Asturies. Decía elli que diba francer col “aisllamientu secular” ya’l déficit históricu nes comunicaciones asturianes que, diz el presidente, llastraba’l so desendolcu económicu. Pa entamar, ta bien que s’entere, depués de llexisllatura y media. 

Pero entamen los peros. No que cinca a la principal llimitación de les comunicaciones d’Asturies pa con España, “Requierse al Gobiernu pa que, en coherencia col procedimientu abiertu pola Comisión Europea, entame los trámites pa l’anulación de la prórroga de veintinueve años otorgada a la concesionaria de la AP-66, suprimiendo el peaxe”. Un díi entardó’l Ministeriu de Tresportes en retrucar: nun tienen nin piensen tener siquiera un estudiu sobre lo que costaría rescatar el peaxe del Güerna, ya’l secretariu d’Estau de Tensportes, José Antonio Santano, declaró esclarecedoramente “na nuesa tiesta nun ta pensar nel rescate”.  Pal 2025, dicen, ya si eso, entrarán a furrular les bonificaciones. 

En cualisquier casu, Adrián fia la solución en comunicaciones esternes al ferrocarril, a una variante de Payares que, con sobrecostu multimiyonariu y 45 años de retrasu trae a la fin un tren que s’emperren en llamar “l’AVE d’Asturies” pero que non. Comu muestra, les cincu hores y media de retrasu nel viaxe Madrid-Asturies ayeri mesmo, que superen les hasta dos hores de retrasu que se dan ca pocu. L’importe’l billete nun se devuelve si el retrasu nun algama polo menos la hora y media. 

Sicasí, les comunicaciones más importantes son les interiores, les que comuniquen Asturies consigo mesma. 200.000 asturianos tienen la tarxeta Conecta, que permite usar el trasporte públicu bien barato per toa Asturies; pena que nun haiga tresporte públicu y que llegar, por casu, de Xixón a la capital de Bimenes (menos de 35 Km) lleve tranquilamente tres hores. Nesi sen, Adrián Barbón fexo los deberes: nel so llistáu de propuestes pa meyorar les comunicaciones recueye los principales fallos del tresporte públicu asturianu, fallos que lleven ehí, apiorando, dende l’aniciu de la so llexisllatura. Lo malo ye que recueye  los problemes, non les soluciones. 

Nun vos esmolezais. El presidente robló una alianza. Too solucionao. 

Llucía F. Marqués

This work is licensed under a Creative Commons Attribution 4.0 International License.