Iniciativa pol Asturianu considera una oportunidá perdida na anovación de la plataforma dixital municipal na que nun hai rastru del asturianu y denuncia que nun se cumpla siquier la toponimia oficial
Iniciativa pol Asturianu llamenta que’l Conceyu de Xixón nun aprovechara l’actualización de l’aplicación móvil municipal pa incorporar l’asturianu. La versión nueva amplía’l catálogu de funcionalidaes y conteníos, pero sigue ensin tener presencia dala de la llingua asturiana nin de la toponimia oficial. L’asociación de reivindicación llingüística considera una oportunidá perdía nun aprovechar l’anovamientu pa incluyir una versión n’asturianu nesta aplicación que tienen instalada nel so teléfonu móvil más de 87.500 xixoneses.
Disponer d’una versión billingüe de l’aplicación permitiría avanzar na normalización social de la llingua asturianu, dando visibilidá al idioma. Facelo nun tendría amás costu adicional pal Conceyu puesto que dispón del serviciu municipal de traducción qu’ufierta la Oficina de Normalización Llingüística.
Iniciativa pol Asturianu llamenta tamién l’incumplimientu de la toponimia oficial nesta ferramienta. La ordenanza municipal d’usu del asturianu recueye que «l’asturianu y el castellanu son llingües propies del Conceyu de Xixón» y fixa que «nes publicaciones, actividaes y servicios municipales utilizaránse l’asturianu y el castellanu de forma afayadiza». Tamién se contravién l’espíritu del Plan de Normalización del Conceyu, qu’establez como oxetivu la xeneralización del usu de la toponimia oficial.
La entidá va llevar la falta de la presencia del idioma na aplicación del Conceyu de Xixón al Conseyu Asesor de la Llingua Asturiana pa reclamar una presencia equitativa y digna del asturianu nesta y otres aplicaciones municipales como la d’Emtusa y Cuida Xixón.
Centru d’Arte Tabacalera
D’otra miente, el presidente d’Iniciativa pol Asturianu, Iván Llera, va proponer mañana a la conceyala de Cultura de Xixón, Montserrat López Moro, que’l nuevu centru d’arte allugáu nel edificiu vieyu de Tabacalera, en Cimavilla, lleve’l nome n’asturianu. La entidá de reivindicación llingüística camienta qu’esta propuesta, que nun tendría coste pal conceyu, sería una manera de visibilizar la llingua asturiana y de caltener un compromisu de normalización nesti equipamientu nuevu de la ciudá.
Susana Sela
This work is licensed under a Creative Commons Attribution 4.0 International License.
