¿cómo una sociedá avanzada y rica puede permitir o, meyor dicho, llevar a una persona enferma a decidir salir del escenariu porque, de siguir n’él, la so familia acabaría na miseria?
Visto nel Facebook de David M. Rivas
Lleí na prensa sobro’l casu d’una llangreana, el nome nun trescendiera, como ye llóxico, que, con esclerosis llateral múltiple, programó la eutanasia enantes de tiempu pola situación económica que taba dexando a la so familia.
Estudios recientes cifren el gastu añal de sufrir esa dolencia ente los sesenta mil y los setenta mil euros. La muyer, amás, nun tenía la cotización a la seguridá social necesaria pa tener pensión, nin muncho menos pa dexáila a la so fía. Un bufete d’abogaos ofrecióse-y pa pleitear y llograr esa pensión, anque la cosa diba ser difícile, ente otres coses pola premura cola que yera mester autuar. La muyer aceutó y pospuso la so decisión de poner fin a la vida. Los abogaos, contra reló, ganaron la demanda y ella morriera seyes menses dempués, dexando pensión al so vildu y a la so fía.
La historia moral podría quedar equí, pero entama la social: ¿cómo una sociedá avanzada y rica puede permitir o, meyor dicho, llevar a una persona enferma a decidir salir del escenariu porque, de siguir n’él, la so familia acabaría na miseria? Pues tengamos claro que nun son pocos los que quieren executar polítiques qu’acaben por xeneralizar esa situación.
This work is licensed under a Creative Commons Attribution 4.0 International License.
