Cerca doscientes persones averáronse na mañana de güei a acompangar a los primeros declarantes nel xuiciu contra los cincu imputaos por una aición de protesta non violenta a les puertes d’Arcelor, onde la policía prohibió la llectura d’un perinteresante manifiestu que compartimos con vos

A les nueve de la mañana entraben a declarar nos xulgaos de Xixón tres de los cincu acusaos por una aición non violenta en protesta poles sovenciones a empreses altamente contaminantes que tuvo llugar el pasáu mes de mayu y na que los cinco imputaos encadenárense cortando la carreteres d’acesu a la planta d’ArcelorMittal en Veriña. 

Convocaos por estremaes organizaciones, acomuñaron allí un bon garrapiellu de persones a amosar el so sofitu y a reclamar que se retiren los cargos contra ellos. Allí, con pancartes onde podía lleese “Explotadores y ecocides sovencionaos, rebeldes a prisión ¿Xusticia?” y “Protestar nun ye delitu” los asistentes preparáronse pa dar llectura a un manifiestu de sofitu, momentu en que la policía allí presente averó a la concentración, anunciando que “acordies a la llei mordaza nun podíen lleer na” y que si continuaben cola llectura procederíen a identificar a tolos concentraos col envís de proponer una sanción. Ante l’esmolecimientu polo que pudiere pasar y pese a dubiar seriamente de si ye llegal impedir una llectura pública, los organizadores prefirieron dexar el manifiestu ensin lleer y espardelu per otros medios, procediendo a esperar pacientemente pola salida de los declarantes a la puerte’l xulgáu. 

A cabera hora, cuando malpenes quedaba una docena persones esperando y pesi aceutar la non llectura del manifiestu, les fuercies policiales procedieron a identificar a los presentes, alegando que “llevaben un megáfonu”

Compartimos colos nuesos llectores el testu del manifiestu, merez la pena lleelu con atención y espardelu:

Bonos díes compañeres.

Tamos equí esta mañana para enfrentar un nuevu casu de represión contra’l derechu a la protesta pacífica. Les cordures del sistema tán saltando y, con ello, vemos cómo la fola de represión y criminalización de los movimientos sociales aumenta esponencialmente, nun intentu d’amordazar y callar la voz de cualquier tipu d’activismu que busque evitar la sienda suicida impuesta polos intereses económicos d’unos pocos.

Un claru exemplu d’ello son les nueses compañeres de les Seis de La Suiza, de quien nos honra tar güei acompañaes y a les que dedicamos nuesa más sincera solidaridá y agradecimientu pol so sofitu. Gracies de corazón por tar equí. Tamos con vós y vamos siguir lluchando pola vuesa llibertá.

El pasáu 18 de mayu llevóse a cabu una acción de desobediencia civil non violenta na que s’atayó’l tráficu de camiones n’una de les entraes de la fábrica d’ArcelorMittal en Xixón pa protestar contra les sovenciones públiques otorgaes a la multinacional, la empresa llíder n’emisiones de gases d’efectu invernaderu y contaminación del aire n’Asturies.

De resultes d’esta protesta cinco nuevos activistes encaren dos procesos xudiciales. N’unu d’ellos la subcontrata de tresporte d’Arcelor pide condergurs d’hasta 3 años de cárcele, más una indemnización de 2400€. Nel otru, la Policía interpon una multa d’ente 600 y 30.000€ por caúna de nós.

Magar el fin últimu d’esti tipu d’acciones ye y va ser siempres denunciar les conductes criminales de grandes empreses y gobiernos, llamentamos el maltar que pudiéremos causar a aquellos camioneros que se vieron afectaos mientres la protesta, en nengún momentu buscamos perxudicar de manera dalguna a los nuesos compañeros y compañeres obreres. Por ello, repitimos la nuesa más sincera comprensión.

Tristemente, namás alzando la voz al traviés d’esti tipu d’acciones llógrase ser escuchaos.
Porque ¿qué ye, que ye licito sovencionar con 450 millones d’euros a una multinacional que cunta con beneficios milmillonarios, mientres sigue aumentando ca añu les sos emisiones, atacando la salú de les ciudadanes y precarizando la situación llaboral de les sos trabayadores?

Llevamos tola nuesa vida contemplando plasmaes como les instituciones públiques incumplen el so deber más fundamental dexando a empreses multimillonaries como ArcerlorMittal destruyir la nuesa salú y la del planeta nel que vivimos. La ciencia lleva décades alvirtiendo que la crisis climática ye la mayor amenaza de la hestoria de la humanidá, la primer crisis que puede dexanos ensin un futuru nel que solucionar toles demás. El costu de la inacción climática nun podría ser más altu, pero los nuesos representantes siguen poniéndose del llau de la élite empresarial, anteponiendo la so cobicia infinita a la dignidá de tolos seres humanos, y hasta de la nuesa supervivencia.

Si les autoridaes nun cumplen col deber de responder arriendes d’ello, ye la mesma ciudadanía la que tien de pasar a l’acción. Si l’estáu dexa qu’empreses como Arcerlor sigan llevándonos escontra’l colapsu climáticu, la única respuesta sensata ye la rebelión y l’activismu pacífico. El nuesu deber coles persones más vulnerables y coles futures xeneraciones.

Lleis como la de Seguridá Ciudadana, conocida como Llei Mordaza, actúen de muriu de contención, resalvando la gravedá y l’urxencia del asuntu y buscando acallantar la voz de quien sí lluchen por una nuevu realidá. Aprovechamos pa mandar un saludu al PSOE y SUMAR, que dempués de 4 años de gobiernu autoproclamado progresista nun cumplieron cola so promesa de derogar esta llei, escurrida mientres la crisis económica col únicu propósitu de reprimir la protesta pacífica y castigar a quienes la exercen.

Aprovechamos nuevamente pa compartir la nuesa solidaridá con toes eses compañeres y compañeros valientes, represaliaos pol estáu por cumplir col so deber cívicu de defender los derechos de les demás. Compañeres almirables como les 6 de La Suiza, condergaes a 3 años de prisión por defender los drechos d’una trabayadora frente a la burguesía asturiana. Como les compañeres del colectivu Aroztak, pa les que se pide 20 años de cárcel por defender pacíficamente la so tierra d’un pelotazu urbanísticu. Pa los 6 antifacistes de Zaragoza, condergaos a cárcel ensin pruebes por manifestase contra la estrema drecha. Pa Juan Manuel Bustamante, Nahuel, l’activista veganu que fai 9 años cumplió 16 meses de prisión acusáu de terrorismu por escribir tuits antisistema y tener productos de llimpieza na so casa (y a quien apocayá se -y concedió una indemnización de 54.000 euros, y non los 266.000 que reclamaba’l so defensa como compensación pol dañu sicolóxicu causáu). Damos la nuesa solidaridá a Adrián Sas, condergáu a prisión por manifestase nel aniversariu del 1 d’Ochobre. Damos les gracies a Asturies Insumisa por defender a les activistes d’esta tierra frente a la represión del estáu. Y recordamos a les compañeres del movimientu climáticu Just Stop Oil en Reinu Xuníu, condergaes a 4 y 5 años de prisión por entamar una acción de desobediencia civil non violenta. El nuesu amor y la nuesa almiración ta con toes elles y con munches más.

Estos exemplos de represión flagrante nun nos amedranen. Ye tantu lo que ta en xuegu, que nun podemos dexanos tener mieu. La única respuesta sensata a la crisis que vivimos ye la llucha.

Munches gracies a toles persones que táis equí, y a los movimientos y colectivos que nos sofitáis. Contra la represión, la solidaridá ye nuesa meyor arma.

Llucía F. Marqués

This work is licensed under a Creative Commons Attribution 4.0 International License.