CometCon tornará convertir Xixón en puntu d’alcuentru del arruelu mozu y alternativu ente’l 6 y el 8 de setiembre. L’eventu preve na so 12ª edición otru récord d’asistencia, qu’en 2023 superó les 24.000 persones
Dempués del ésitu de la edición del añu pasáu, CometCon yá tien a puntu el programa pa esti 2024,
con un fargatáu d’actividaes y figures destacaes de los ámbitos del entretenimientu virtual, llibros, videoxuegos, ilustración, música, ciencia ficción, rol, baille o cómic, ente munchos otros.
La XII CometCon va tener llugar ente’l 6 y el 8 de setiembre nel recintu ferial Luis Adaro de Xixón. Como ye vezu, el calendariu pa estos díes va tar apináu d’alcuentros y actividaes d’altu interés pa mozos, adultos y families, con zona de videoxuegos, cosplai, tiendes y restauración, too ello cola presencia y
participación de munchos de los nomes más relevantes del arruelu alternativu a nivel nacional. Como adelantu, revelamos dalgunos d’ellos:
Elesky, pianista profesional con cuasi 200.000 siguidores en Instagram, collaboradora de Play
Station y, amás, xixonesa, que lleva más de siete años creando conteníu d’alta calidá dende los
sos dos grandes pasiones: la música y los videoxuegos; Javi Olivares, ceador de la canal de YouTube La botella de Kandor, dende’l que comparte Prensa CometCon les sos conocencies sobro superhéroes (Marvel y DC), Star Wars, cine, cómics, series y mundu freak col so más de mediu millón de soscritores;
Joseju, youtuber con casi un millón de soscritores que destaca pola profesionalidá de los sos videos, qu’inclúin gameplays y analís tantu de títulos específicos de videoxuegos como de la industria polo xeneral, con un particular sen del humor; Eric, la mente tres de la canal de YouTube Leyenda & Videojuego, tamién con cuasi un millón de suscriptores, que parte de la so pasión pol gaming pa crear videoensayos sobro hestoria, diseñu ya intereses del mundu del videoxuegu, y vuelve un añu más a CometCon pa realcontrase colos sos munchos siguidores n’Asturies.
“Yá confirmemos el 100% de la nuesa ufierta comercial, con más de 160 puestos distintos, y siguimos trabayando en crear la meyor ufierta d’ociu pa la mocedá asturiana. Ca añu buscamos superanos, que la xente esfrute más y viva xuna esperiencia inolvidable”, afirma Héctor Lasheras, organizador del eventu. Como n’años anteriores, los asistentes van esfrutar de diversos espacios destacaos, como la zona de gaming, que va cuntar con equipos d’última xeneración, realidá virtual, torneos y competiciones
de los videoxuegos más destacaos y competitivos. Nun van faltar los concursos, que tán ente los momentos más esperaos del eventu. Mientres estos trés díes, los asistentes van esfrutar del Dancie Arena, el CometCon Talent y elCosplay Stage. Estes actividaes van tener como oxetivu poner a preba les capacidaes de los participantes, fomentar el talentu y partir premios bien llambionos.
Fieles al espíritu de la CometCon, van ufiertar espacios diversos onde aprender y espresase al traviés de la tecnoloxía, talleres lliterarios, pintáu de miniatures y talleres infantiles, ente otres. A estos espacios sumamos una Zona Maker destinada a tresmitir conocencies innovadores ente los más nuevos con talleres Steam, y empreses asturianes y madrilanes de drones ya impresión 3D. Nun van faltar los yá clásicos y bien demandaos puestos d’artesanía y merchandising rellacionaos col mundu del cosplay, videoxuegos, cómic, arte, rol ya ilustración.
Les entraes yá tán a la vienta y pueden adquirise dixitalmente en www.cometcon.org o bien na mesma taquilla del eventu.
Alberto Rodríguez
This work is licensed under a Creative Commons Attribution 4.0 International License.
