El 25% del agua potable d’Asturies -el 40% más que va una década- piérdese n’averíes del sistema. Del restu, el mayor consumidor ye la planta de Veriña d’ArcelorMittal
La Memoria Anual de Cadasa, el Consorciu d’Agües d’Asturies, informa de que’l 98% del agua que se consume n’Asturies procede de los banzaos de Tanes y Rusecu. Esi ye’l so orixen, pero la fin de los 847.338 metros cúbicos d’agua que se consumen n’Asturies nun ye tou -nin de lloñe- pal consumu humanu, animal y de regadios.
De fechu, el principal consumidor d’esti agua que sal del parque natural de Redes ye una instalación industrial, la factoría d’Arcelor, qu’estropia pal so furrulamientu el 23% de tol agua potabilizao por Cadasa: 13,13 millones de metros cúbicos. Otros grandes consumidores industriales d’agua potable son Asturiana de Zinc (1,99 millones de metros cúbicos), Central Llechera Asturiana (1,19) y Du Pont (0,96). un total d’alrodiu de 27 millones de metros cúbicos d’agua.
Sicasí, la mayor proporción del agua apta pal usu humanu d’Asturies nun va a la industria tampocu: cuasi la cuarta parte piérdese pel camín en falles de soministru, acordies los datos facilitaos pol Institutu Nacional d’Estadística (INE) nel so informe «Estadística sobre’l Soministru y Saneamientu del Agua». Fugues, rotures o averíes na rede prevoquen la perda de millones de llitros d’agua ca añu, en concretu nel 2022 (caberu añu del que tenemos datos) foron 28,2 millones, una cifra qu’amás contrasta cola del 2006, cuando se perdieron 11,6 millones.
Quiciás, incluso dientro de la crisis climática, se tenga la sensación de que lo que sobra n’Asturies ye agua. Nun hai que perder de vista les consecuencies de la seca nin el coste d’esos banzaos de los que s’esbardia l’agua: cola so costrucción los conceyos de Casu y Sobrescobiu perdieron les sos vegues más productives y supuso el desaniciu del mou de vida de muncha xente -fábrica de muebles, restaurantes, esplotaciones ganaderes…-
Nun ye una perda inevitable, ye desidia y falta d’enfotu en curiar les infracadarmes: frente al 25% de perda d’agua n’Asturies, l’estáu presenta una media del 0’2%.
Llucía F. Marqués
This work is licensed under a Creative Commons Attribution 4.0 International License.
