Llucía F. Marqués
Si lo llamaren “maniobres militares del exércitu sobro zona urbana” sonaría mui feo y taría prohibío. Si lo llamaren “Conmemoración del bombardéu sobre la población civil de Xixón” habría protestes. Comu lo llamen “Festival Aéreo”, la población apetugúñase na playa a ver pasar los aviones
Desllucía pola borrina, pero tan española comu siempres, la demostración añal de potencia bélica ocupó ayeri la sablera de Xixón nun mui español exerciciu de “yo téngola más grande”. 87 años esautos dende’l primer vuelu militar del exercitu español perriba Xixón, siguin sobreesnalando la sablera. Nun falten dengún añu a cellebrar l’aniversariu del so gloriosu bombardéu a la ciodá, remembrando arguyosos comu mos mataron.
Abaxo, na sablera y alredores, son miles les oveyes qu’aceuten gustoses la masificación, el dolor de pescuezu, el calor y l’aburrimientu con tal de ver máquines de matar debuxando corazones en cielu, mientres esparden tonelaes de fumu contaminante que respiren con gustu los descerebraos dende la sablera.Y aplauden, miles d’asturianos miren al exércitu qu’atacó a civiles comu ellos nesi mesmu llugar, y aplauden. ¿Ignorancia? ¿falta de xacíu? ¿falta d’autoestima? ¿falta d’ética? de tou un pocu, pero más que na, la capacidá de la oveya media pa dexase llevar polo que dicen que “mola” ensin parase a camentar que igual ye una aberración. Nun falten tampocu a la cita les banderes del reinu, metiéndo-yos polos güeyos unos collores que, na so falta de pensamientu críticu, acabarán identificando comu propios.
Entantu, la mio vecina, Amila, preslla les persianes y emprésllase’n casa cola familia: fuxen d’otros bombarderos y sentir estos -llevamos tres díes careciéndo vuelos perriba nos- esconsoña imaxes de desaniciu y muerte que quieren escaecer. Los supervivientes del bombardéu a Xixón nel 1937 -sí, entá queden dalgunos vivos pa remembralo- aprieten los puños con noxu ya incredulidá repetía: son los mesmos aviones, el mesmu exércitu, la mesma bandera que quixo matalos, que mató a tantos asturianos, equí mesmo, nel mesmu cielu, na mesma ciodá.
15 meses de bombardeos por mar y aire dirixíos pol exércitu español, 500 díes cayendo bombes enriba la ciudá, les ciudaes, los pueblos d’Asturies, disparaes polos predecesores de los aviones que -cualisquier cosa menos inocentes- ayeri emporcaben el nuesu cielu, páxaros de mal agüeru, máquines de matar idéntiques a les que sobrevuelen Gaza, pilotaes por persones entrenaes pa saber matar, que cobren por saber matar.
Véndenmos como arruelu prestosu les maniobres militares perriba la nuesa ciudá: esto namás ye posible gracies a una ignorancia bien planificada: los neños d’Asturies nun estudien nos llibros de testu la hestoria na que somos víctimes, nun se fala de la desapaición del pueblu de Tarna, de Cangues desaniciada fasta la cabera piedra, de Xixón sobroviviendo más d’un añu baxo les bombes. Quieren qu’escaezamos, ¿pa poder repetir?.
This work is licensed under a Creative Commons Attribution 4.0 International License.
