La Encuesta de Población Activa EPA amuesa un repunte del paru mientres Asturies continúa con una alamante baxa tasa d’actividá, la pior del estáu ya un paru en mocedá del 30%
Los datos fechos públicos pol INE en relación a la EPA del segundu trimestre de 2024 alerten de la perda de 1.800 emplegos, una perda del -0,5% nos normalmente positivos meses d’entamu del branu y mientres nel restu l’estáu se crea emplegu a un ritmu del +2,1%.
Teniendo una baxísima tasa d’actividá, motivada pol avieyamientu de la población ya’l desánimu deriváu de les poques oportunidaes d’emplegu (trabaya o busca trabayu namás la metá de la xente de más de 16 años), son 53.500 asturianos los que quieren trabayar y nun lo consiguen, de los que más de la metá, 28.200, lleven más d’un añu a la infructuosa gueta d’un emplegu. La tasa de paru pente la mocedá algama un llaceriosu 30% ya’l 7,46% de los llares d’Asturies tienen a tolos sos ocupantes queriendo trabayar ensin conseguilo.
El remate d’esta traxedia ye’l fechu que más de la metá de quienes si trabayen faenlo en situación tan precaria que’l salariu nun ye abondo pa salir de la situación de probitú, siendo asina que trabayar ya nun ye garantía de llevar una vida digna, nin siquier de conseguir una vivienda, siendo ello que’l preciu mediu del arriendu iguala cuasi la cifra del SMI.
Nel Dos Santos
This work is licensed under a Creative Commons Attribution 4.0 International License.
