Llucía F. Marqués
Un periódicu español creese que ye obligatorio calzar madreñes na Ruta’l Cares: una reflexón sobre comu nos ven y sobre la dificultá crónica pa pescanciar la coña asturiana.
Cuando mio ma de neña foi a Logroño sosprendiéronse de que nun fuere en madreñes, de que supiere lleer y si me descuides, de que nun tuviere cuernos y rau.
Años depués, siendo yo moza, en Barcelona entrugáronme como controlábemos el tráficu nes ciudaes “con toes eses vaques sueltes peles carreteres”.
L’imaxinariu español de lo que ye un asturianu nun camudó muncho dende entós ya inclui necesariamente madreñes, una vaca (o pites) al llau, escasa formación y l’actitú servil de quien recibe con besamanes al señoritu; imaxen reforciada pol provincianismu imperante nos socesivos gobiernos asturianos, qu’aparte de la so propia actitú servil fomenten vergoñes comu la presentación d’Asturies a influencers de tol estáu con “pueblerines” (que non muyeres de pueblu) faciendo’l papel de paletes.
Esta imaxe que tienen de nos queda retratao otra vuelta na noticia espublizada en La Vanguardia, dando por bona la información d’un tuiteru que, en tonu irónicu y con manifiesta coña, denunciaba la multa a un turista por nun dir de madreñes a la Ruta’l Cares, noticia perotru lláu lliteralmente calcada pol revesosu sistema de corta y apiega del citáu tuit.
La noticia que los escasamente informaos periodistes recueyen ye la multa de 153,7 € a un turista por nun calzar madreñes na Ruta’l Cares, mencionando incluso la esistencia d’una normativa qu’obliga a ello, porque ta nidio que n’Asturies andamos toos, tol añu, en madreñes.
Da igual que teamos una altísima proporción de persones con estudios superiores, una lliteratura rico dende’l medievu o una universidá con sieglos d’hestoria… pa ellos seguiremos siendo aldeganos con madreñes a los que mirar perriba’l llombu, dicho seya esto con tol respetu polos aldeganos y poles madreñes, pero dengún pa los que se creen con drechu pa miralos perriba’l llombu.
This work is licensed under a Creative Commons Attribution 4.0 International License.
