La formación nacionaliega Andecha Astur reclama al presidente soluciones pa los problemes qu’aquexen a Asturies y a los que namás elli, dende’l so puestu, pue dar igua; si amás, nel so ámbetu priváu, anda a la gueta gatos perdios, perfecho.
“Nun hai ná de malo n’esmolecese por un gatu… el problema ye que s’esmolez por eso y non pola paciente con cáncanu de pulmón que lleva más de dos meses esperando operase”
Con motivu del esmolecimientu del Sr. Presidente pol gatu perdíu -y afortunadamente topáu- por una neña polesa, dende Andecha Astur llanzabase’l viniente comentariu: “!18.000 nuevos paraos, (perpasamos los 53.000), el 40% de la mocedá forciao a emigrar, tasa población activo más baxa del Estáu (50,7%), 21.500 llares asturianos con tolos sos miembros en paru, cola Sanidá Pública esfarrapada… y los ésitos d’ Adrián Barbón son atopar un gatín. ¿Ye esti’l presidente qu’Asturies necesita? ¿De verdá?”.
Ante la reación de dalgunos de los llectores del post, defendiendo los drechos del gatu y la rapaza, Andecha Astur desplica la situación pa evitar enquívocos “Nun hai ná de malo n’esmolecese por un gatu… el problema ye que s’esmolez por eso y non pola paciente con cáncanu de pulmón que lleva más de dos meses esperando operase, o les 21.500 famlies que tienen tolos sos miembros en paru, o los 53.000 paraos d’Asturies…. Esi ye’l problema, lo del gatu ye la espresión del problema, non el problema en sigo mesmu”.
En resume, el gatu ye aneudóticu, la cuestión ye cuáles tienen de ser les prioridaes d’un presidente nel exerciciu les sos funciones.
Nel Dos Santos
This work is licensed under a Creative Commons Attribution 4.0 International License.
