Les asociaciones que formen parte de la Plataforma contra les violencies machistes aconceyaron ayeri, comu ca primer miércoles de mes, a reclamar soluciones pal andanciu machista que tantes vides cobra, nun mes especialmente tráxicu.

Nesta ocasión la intervención -que va rotando pente les estremaes organizaciones que componen la plataforma- recayó en Carme Pérez, en representación d’Andecha Astur.

Xunetu entamaba, como recordó Carme, con cuatro muyeres y dos fios asesinaos en 24 hores; el segundu fin de selmana foron cincu muyeres nun solu díe. Namás nos primeros 15 díes d’esti mes la cifra de muertes por ser muyer sumaben un terciu del total de muyeres asesinaes no que va d’añu. Ante esto, ye cierto, convócase gabinete de crisis y los responsables políticos reconocen que’l sistema Biogen que debiere protexer a les muyeres, falla. Ante esto, Carme Pérez destaca la dureza de que los cargos públicos que se dicen progresistes y que tan nesi cargu pa velar pola seguridá y la propia vida de les persones que tan amenazaes yos digan directamente “muyeres, el sistema nun vos protexe, porque’l sistema nun furrula”. Asina, recalcó, munches d’estes muertes -recordemos, 53 no que va d’añu, diez d’elles menores- yeren evitables y nun s’evitaron.

Poro, reclamó responsabilidaes a quienes teníen y tienen la obligación de protexer a les víctimes qu’asuman les sos obligaciones, garantizando la seguridá de les ciudadanes.

Urxe alcontrar una fin al feminicidiu y ta nidio, viendo la progresión de los asesinatos mes a mes, que por agora nun se ta faciendo abondo p’aparar esta llácara. Poro, Andecha Ástur, Anticapitalistes, Dar de mamar, Asociación de Pensionistes de Xixón,   Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo continuarán llamando a aconceyase los prósimos miércoles caberu de mes.

Nel Dos Santos

This work is licensed under a Creative Commons Attribution 4.0 International License.