Pesi a la reciente incorporación de dos urólogos, Avilés sigue ensin cubrir 35 places sanitaries pa reemplazar baxes y xubilaciones, ensin cuntar coles vacaciones
Acordies los datos apurrios pol Simpa (Sindicatu Mélicu Profesional d’Asturies) de los 35 mélicos que falten nel área sanitaria d’Avilés, 26 tendríen de trabayar nel Hospital Universitariu San Agustín ya’l restu a los Cientros de Salú d’Atención Primaria del conceyu.
Los responsables alleguen falta de profesionales pa nun proceder a les contrataciones. Hai que tener en cuenta que los profesionales sanitarios nun tan interesaos en venir a trabayar a Asturies, daqué comprensible viendo les meyores condiciones llaborales n’otros territorios. Amás, los númberos clausus na Universidá d’Uviéu y les llendaes places MIR dificulten la formación de nuevos mélicos n’Asturies.
Les consecuencies son les esperables: demores de más de tres meses nes especialidaes de Cardioloxía, Dermatoloxía y Traumatoloxía, fasta ocho meses si se trata d’una consulta d’Uroloxía. Les llistes d’esperes allárguense, con cuasi 7.000 avilesinos a la espera d’una preba d’imaxe, 2678 pacientes pendientes de consulta siquiátrica, 932 persones qu’esperen una consulta en cardioloxía y 2643 pendientes d’una intervención quirúrxica, por dar dalgunos exemplos.
Pente les soluciones propuestes, comu non, la esternalización de les consultes, afondando nel procesu de privatización de la Sanidá Pública Asturiana.
Alberto Rodríguez
This work is licensed under a Creative Commons Attribution 4.0 International License.
