Mientres munchos s’enfoten nos resultaos de les Olimpiaes, en Casu prefieren dedicar la so atención a una disciplina esportiva más propia: la Carrera de madreñes
Na competición, que tien categoría de Campionatu Mundial, participaron un total de 123 inscritos -23 más que n’anterior edición-, de los que 46 yeren muyeres, 59 homes y 18 pertenecíen a la categoría de reciella. La preba consiste nun percorríu circular de 280 metros.
La competición, que cuntó con abondu públicu, desendolcóse por tramos d’edá, entamando por neños d’hasta siete años, onde los ganadores foron los Cabilla, Hugo, Diego y Marco. Siguieron les neñes d’esa mesma edá, demostrando la fuercia de la familia, ya que la campiona foi Marta Cabilla, siguida de Paula Lozano y Mía Fernández.
De siete a catorce años el ganador masculín foi Pablo Menéndez , mientres que Verónica Suárez trunfaba na estaya femenina. Na categoría de 14 a 49 años el podium de muyeres foi pa Patricia Lozano, Elena Millas ya Isabel López; n’homes l’oru foi pa Esteban Corral, per delantre de Raúl Barbón y Javier García.
Finalmente, la estaya senior tuvo por ganadora a Noelia Fernández, mientres que Blanca Iris Sánchez y María Isabel García conseguíen la plata ya’l bronce. En más de cincuenta años, el primer clasificáu masculín foi Manuel Antón Fernández, con José Manuel Posada y Antonio González en segundu y tercer puestu.
Tamién se entregó la distinción “Madreñina del añu” a Alejandro Fernández Junco, madreñeru de Bezanes d’84 años.
This work is licensed under a Creative Commons Attribution 4.0 International License.
