Cangas acoyó esta pasada fin de selmana una nueva edición del Prestoso Fest, que volvió demostrar por qué ye un de los festivales más especiales del país
Un añu más, el festival de referencia del suroccidente asturianu, volvió esbardiar personalidá mientres trés díes completos de muncha música combinaos con actividaes complementaries trescalaes d’un gran valor cultural y pensaes para papar a tolos asistentes de los valores esenciales colos que nació’l festival: redolada privilexada, compromisu cola natura, impulsu de la economía llocal y diversidá ya inclusión, que se convirtieron nun leitmotiv y fixeron d’esta cita un acontecimientu totalmente distintu ente la gran ufierta esistente na temporada braniega.
Dende la organización del festival amuésense “felices con esta edición, tanto a nivel de públicu, que foi récord, como colos comentarios de los asistentes, que yá anuncien que van volver el próximu añu. Nun dexamos de recibir comentarios positivos tantu del públicu asistente como de les bandes, estimando’l formatu amable del festival que dexa esfrutar al 100% tantu de la música como la redolada y la gastronomía, tou un ésitu nesta edición cola instalación de la zona “Alimentos del Paradisu” na cortil del festival”.
Y ye que, nesti 2024, fueron 5.000 persones les qu’esfrutaron de les distintes propuestes del festival que s’estremaron ente les nueches de música nel Prau de Las Barzaniellas (con una ventena de bandes y artistes nacionales ya internacionales y los trelce DJ que xubieron al Escenariu Mini Autosa nos interludios de conciertos), les sesiones de mañana del Escenariu Momentos Alhambra del patiu del Conceyu y del Parador de Corias y les distintes actividaes complementaries, raspiando’l llenu en tolos eventos.
Dende’l festival amuesen tamién la so allegría pol efectu multiplicador y ye que “Cangas y la so contorna colgaron el “completu” n’hoteles, restoranes, etc. L’impactu na zona del festival medra añu tres d’añu, convirtiéndose yá nun motor económicu de primer nivel pa la contorna, arreyando a tou tipu de negocios y empreses de la zona”.
Per otru llau, Prestoso Fest ta comprometíu con curiar la redolada y lleven por bandera que “cuando’l festival termine, solo queden les nueses buelgues nel terrén”. Asina, al igual que se fixo na edición pasada, yá tán trabayando en conocer l’impactu medioambiental pa compensar esa buelga de carbonu con un proyectu certificáu, el mesmu que yá en 2022 llevó a llantar cientos d’árboles de la mano de la ONG Saving The Amazon, convirtiéndose d’esta forma nun festival neutru en carbonu
La organización ta yá pensando en 2025 “una y bones la respuesta tan positiva del públicu cuasi nos obliga a entamar a trabayar na próxima edición. Pa nós ye un arguyu comprobar que la xente aprecia’l festival que diseñamos y apuesten por esti tipu d’eventos, nuna redolada rural y que dexa esfrutar de too tipu d’actividaes. Tamién resulta fundamental el sofitu institucional, tanto del Conceyu de Cangas como’l Principáu d’Asturies como de patrocinadores como Cerveces Alhambra, Mini Autosa o Caxa Rural, porque un eventu d’estes característiques sedría invidable ensin la participación de toos ellos”.
“Ser un altavoz pa Cangas y el suroccidente d’Asturies va siguir siendo un de los grandes oxetivos del festival pa 2025, siguiendo cola crecedera de les últimes ediciones ensin perder de vista que, primero de too, somos un festival que tien de curiar tantu de los artistes como’l públicu, los grandes “culpables” de qu’esto siga adelantre” declararon.
Susana Sela
This work is licensed under a Creative Commons Attribution 4.0 International License.
