Dende los colectivos de la Plataforma Solidaria Asturies con Palestina, convocóse d’urxencia esta actividá de refuga a los asesinatos y destrucción na escuela d’A el-Tabein en Gaza na que se desixó l’altu al xenocidiu, rotura de relaciones col sionismu criminal, embargu militar, fin de la ocupación y el apartheid.

Ayeri más de cien persones foron achuquinaes pol exércitu israelín mientres s’abellugaben nuna escuela. Los medios reportaron que los palestinos que s’abelugaben dientro del complexu escolar taben rezando cuando l’exércitu d’ocupación atacar con siquier trés ataques aéreos. Esta escuela allugaba siquier 2.500 palestinos desplazaos.

Tamién señalen que les persones que sobrevivieron describieron esti ataque como un de los peores díes en Gaza dende’l 7 d’ochobre. “L’equipu de defensa civil dixo que pudieron atopar 100 cadabres, pero tán diciendo qu’inda hai más cadabres atrapaos. Nengún cuerpu de los asesinaos quedó completu; la mayoría tán tan desfiguraos que nun pueden reconocese”.

Informes preliminares indiquen que l’exércitu israelín españó trés bombes de fabricación estauxuniense nel ataque, que tenía una terrible capacidá pa quemar, dilir y destruyir cuerpos. Como resultancia, más d’un centenar de palestinos foron asesinaos, incluyendo delles families, y destacaes figures académiques de les universidaes de Gaza, ente ellos el profesor Youssef Al-Kahlout.

El diariu israelín Haarets diz güei que ” La retafila de condergues internacionales amuesa un cascarón vaciu: Les naciones del mundu tienen la capacidá de forciar el fin de la guerra, pero abstiénense de faelo. La lletanía de declaraciones que llamenten les víctimes civiles convirtiéronse nun ritual vacíu.” Como pueblu, los asturianos tenemos na nuesa man reclamar al nuesu gobiernu qu’eses declaraciones tengan un conteníu real, práuticu, que s’espeye na fin del sofitu económicu y políticu a Israel. 

Ello ye lo que se reclamó na multitudinaria concentración cola que se retrucó al ataque del domingu, una más de les munches demostraciones de sofitu del pueblu asturianu pa col palestín dende l’entamu del conflictu.

Nel Dos Santos

This work is licensed under a Creative Commons Attribution 4.0 International License.