El descreyimientu de los asturianos ta recoyíu a lo llargo de la hestoria dende va sieglos, especialmente en comparanza col calter beatu de la mayor parte de los territorios españoles.
La ilesia n’Asturies pasa per malos momentos, si ye que dalguna vegada pasó per bonos. Diz el refrán “Asturianu, mal cristianu”. Debe ser verdá porque acordies les encuestes desendolcaes pol Centru d’Investigaciones Sociolóxiques (CIS) nos caberos once barómetros, l’80,1% de los asturianos afirma nun practicar denguna relixón; del 19,9% de los practicantes de dalgún credu, el 18,6 % considérase católicu practicante y d’ente ellos pocu más de la metá, el 51%, va a misa semanalmente.
Pesi a que tolos ñacios demientres la dictadura franquista tan bautizaos, por imperativu llegal, lo cierto ye que la inmensa mayoría de los “católicos” asturianos nun lo son, siendo frecuentes les campañes d’apostatasia col envís d’amosar a la ilesia católica el xorreciente desalcuerdu de los asturianos pa con esta organización relixosa.
Les cifres caen más entá pente la mocedá, siendo asina que namás el 13% de les persones d’ente 18 y 39 años practiquen dalguna relixón.
Asturies, xunto con Cataluña, el Pais Vascu y Galicia son los territorios menos creyentes del Estáu.
Nel Dos Santos
This work is licensed under a Creative Commons Attribution 4.0 International License.
