L’alcalde de la ciudá bretona y el presidente del Festival Intercélticu de Lorient acueyen a los representantes de les delegaciones celtes. 

L’alcalde de Lorient, Fabrice Loher, acoyó col presidente del FIL, Jean-Philippe Mauras esti martes 13 a los representantes de les delegaciones de los países celtes na casa conceyu de la villa. Esta cita, un clásicu del festival, ye un puntu d’alcuentru pa que les persones más relevantes de cada país puedan anovar los llazos de fraternidá y xunión ente sí y pa con Bretaña.

La edición, dedicada a la mocedá, trai los talentos y promeses futuros del interceltismu. Pa ellos tuvo unes pallabres l’alcalde, quien dio les gracies en nome de Lorient enteru por facer que’l festival seya un ésitu cada añu. Recordó-yos, tamién, que tán dando tira a una cultura milenaria y que, nesi llabor, el racismu  y el sexismu nun tienen llugar, porque l’interceltismu ye apertura, intercambiu y cordialidá.

D’ente la intervención de Nueva Zelanda, Australia, Cornualles, Escocia, Islla de Mann, Irlanda y Gales hemos destacar, amás, la de Galiza, que fizo una muestra del entroido ourensán y Asturies, representada por Ana Belén Alonso Losa (concejala de Educación y Normalización Lingüística del concejo de Mieres) e Iñaki Sánchez Santianes (presidente de la delegación asturiana), quien tocó una pieza n’alcordanza de Fernando Rodríguez Pérez, ún de los mayores collaboradores de la delegación asturiana que morrió a entamos d’añu.

Aymara González Montoto

This work is licensed under a Creative Commons Attribution 4.0 International License.