Baxel relluma nel Festival Intercélticu de Lorient cola fuercia del folk asturianu.
Esti fin de selmana, el grupu asturianu Baxel ufiertó un vibrante conciertu nel prestixosu Festival Intercélticu de Lorient, ún de los eventos más importantes a nivel mundial pa la música celta, anguañu na so 53a edición.
Orixinarios de Ribeseya, nel oriente d’Asturies, Baxel algamó a, en pocu tiempu, consolidase comu una de les propuestes más fresques y prometeores del panorama musical asturianu. Formaos n’ochobre de 2021, el grupu vieno collechando ésitos gracies a la so habilidá p’amestar la tradición con un toque contemporáneu que resona tantu colos amantes del folk más puru comu con nuevos públicos.
Demientres la so presentación en Lorient, Baxel tocó un repertoriu qu’afitose cola so riqueza y diversidá, reflexando l’amplitú del folclor asturianu. Ente los cantares interpretaos, el públicu pudo esfrutar de pieces tan emblemátiques comu’l Cantar del Simpatías y munches xotas bailladeres que fixeron cimblar a l’audiencia cola so enerxía y ritmu contaxosu. Estos cantares, fondamente enraigonaos na tradición asturiana, foron executaos con un virtuosismu qu’ablucó tantu a los veceros llocales comu a los numberosos visitantes internacionales del festival.
Ún de los momentos más emotivos de la nueche llegó cola interpretación de Ponga, una composición propia del grupu. Esta tema, que rinde homenax a Puru, el bodranista del renomáu grupu Corquiéu, ye una amuesa del respetu y almiración de Baxel polos grandes músicos que marcaron la escena del folk asturianu, remembranza que tamién fixeren a Elías de Llan de Cubel. La pieza foi acoyía con gran entusiasmu y aplausos, evidenciando la conexón fonda que Baxel supo caltener col so públicu al traviés de la so música y de la hestoria que lleva detrás cada canciu.
L’actuación siguió cola interpretación de temes como Coyí d’un artu una flor, cuplés y Xota Caldueñín, que traxeron a los asistentes nun viaxe polos paisaxes sonoros d’Asturies. Cada cantar foi interpretada con una precisión y una pasión que reflexen el compromisu del grupu col caltenimientu y espardimientu del so heriedu cultural. Los arreglos musicales, al empar respetuosos cola tradición y creativamente anovaores, foron ún de los aspeutos más destacaos del conciertu y bien acoyíu pol mozu públicu lorientés.
El pieslle l’espectáculu llegó colos músicos engalanaos coles banderes de Asturies y de Bretaña, causando xaréu. Esta sensibilidá ye una de los finxos identitarios de la esencia de Baxel: una banda que, en pocu tiempu, llogró non solo alicar y revitalizar el folclor asturianu, sinón tamién llevalu a bon puertu nun escenariu internacional tan prestixosu comu’l de Lorient. El públicu, visiblemente emocionáu, despidió al grupu con una ovación que promete ser solo l’empiezu d’una carrera ascendente pa estos músicos ribeseyanos.
This work is licensed under a Creative Commons Attribution 4.0 International License.
