Dende los anicios apostó pol consumu sostenible, los productos de proximidá y un proyeutu d‘economía circular.
Tierra Astur Poniente, que dende los sos inicios apostó pol consumu sostenible, los productos de proximidá y un proyeutu d’economía circular, xúnese a la llista llocal d’empreses certificaes nel estándar Biosphere Sustainable. César Suárez Junco, sociu fundador y direutor xerente de Tierra Astur, recibió güei la placa qu’asina lo certifica de manes d’Ángela Pumariega Menéndez, vicealcaldesa de Xixón y conceyala d’Economía, Emplegu, Turismu y Anovación.
La certificación distingue a empreses y entidaes qu’amuesen nos sos procesos de xestión un gráu altu de compromisu col cumplimientu de los 17 ODS (Oxetivos de Desarrollu Sostenible), afitaos pola Axenda 2030 de Naciones Xuníes y que tien como envís final una responsabilidá mayor na toma de decisiones de tolos axentes del turismu, nos ámbitos ambientales, económicos, culturales y sociales, algamando asina un aumentu de competitividá, calidá y diferenciación.
Tocántenes a los llogros en sostenibilidá de Tierra Astur Poniente, Pumariega destaca que “sobresal el so enfotu en liderar la recuperación y defensa de los productos artesanales asturianos y da-yos el llugar qu’enxamás tuvieren nes sidreríes. Destaca la so collaboración con una montonera de proveedores, sobre manera artesanos, amparaos por maraques de garantía de calidá como les DOP, IXP y el sellu Alimentos del Paraísu, lo que reflexa’l compromiso col país y con averar al veceru’l sabor auténticu d’Asturies. Tamién defiende’l patrimoniu llocal y los vezos, como’l sofitu a la cultura sidrera asturiana”. Tierra Astur Poniente puxa pol medru social y económicu de la so contorna, la recuperación y dignificación d’oficios como “Mayestru Escanciador”, “Guisandera” o “Mayestru Parrillero”, sinónimu de buen facer profesional que tresmitir a les nueves xeneraciones. El so compromisu cola sociedá, l’emplegu y la integración céntrase dafechu n’ufrir una primera oportunidá llaboral a persones moces en riesgu d’esclusión social de dellos coleutivos. Contribúi a l’anovación col usu de la teunoloxía en tola cadena de valor y el retu d’implicar a tolos trabayadores nel procesu de tresformación dixital”.
César Suárez Junco, sociu fundador y direutor xerente de Sidreríes Tierra Astur, sorrayó lo especial d’un sellu como esti qu’estrema “valores básicos ensin los que Tierra Astur nun tendría sentíu. Los proveedores de proximidá, un apueste pola cultura llocal o pol consumu con conciencia formen parte del nuestru ADN tanto como la sidra, los quesos asturianos o les carnes llocales”. Suárez Junco agradeció al Conceyu de Xixón que s’enfote n’aiciones como esta qu’apuesten pola sostenibilidá; “va cuasi 40 años, cuando ñació Tierra Astur cuasi nun sabíemos nin pone-y nome a esti convencimientu del consumu de productu llocal. Güei, décades más tarde, emocióname ver cómo cada vez somos más los que tamos convencíos de que, si queremos qu’Asturies siga siendo la nuestra Asturies, debemos pensalo a la hora d’escoyer lo que consumimos y ónde lo consumimos”
Con Tierra Astur Poniente yá son 28 les empreses y entidaes de Xixón que cunten con esta certificación en sostenibilidá turística, que reconoz el so apueste y compromisu colos 17 Oxetivos de Desarrollu Sostenible (ODS) de les Naciones Xuníes, algamando un equilibriu nes dimensiones económica, ambiental y social, beneficiosu pa la empresa, el destín y la redolada.
Nel Dos Santos
This work is licensed under a Creative Commons Attribution 4.0 International License.
