L’apueste pola República Asturiana como opción de futuru y la vindicación de la figura del Conseyu Soberanu como representante del enfotu del pueblu asturianu na so llibertá ya’l so futuru protagonizaron l’homenaxe a los asturianos que defendieron el país frente les tropes facistes españoles en Tarna.
La xornada d’homenaxe entamó a les diez de la mañana, cola xubía a les trincheres del Abidular – la Filispardi dende’l Puertu Tarna. Allí llantaron una asturina, depués de comprebar in situ la tremenda fazaña d’aquellos homes y muyeres qu’escavaron les trincheres no alto’l monte pa defender el país frente a les tropes facistes españoles.
A la vuelta, ya nel Puertu, xuntáronse coles persones que ya esperaben pal homenaxe floral ente’l monumentu llantáu na llende ente Asturies y Llión, en remembranza de la hestórica declaración de Soberanía, cola que’l Conseyu llibrábase del xugu que suponía la República española, y asumía la defensa de la so independencia y soberanía.
Na intervención política Donato X. Villoria facía un repasu a esta heróica xesta, denunciando la falsa transición del franquismu a la monarquía borbónica y como nel casu d’Asturies, a diferencia del restu de naciones del Estáu, “en cuenta de recuperar la istitución política previa al franquismu que mos representaba, el Conseyu Soberanu, impunxéronmos ensin dexamos votalu, un estatutu y un «Principado» ensin denguna base social, que nun va acullá d’una cenciella descentralización alministrativa”.
Ello asina, los representantes d’Andecha Astur afitáronse na necesidá de recuperar la soberanía como ferramienta p’avanzar nun proyeutu común que permita superar la situación de sometimientu que carecemos anguañu, garantizar la supervivencia como pueblu y avanzar haza una sociedá más xusta ya igualitaria, avanzando “haza una República Asturiana que seya garantía de democracia, de respetu a los drechos individuales y colleutivos, y garantía de futuru d’esti país d’homes y muyeres llibres.”
Nel Dos Santos
This work is licensed under a Creative Commons Attribution 4.0 International License.
