El stand del Conceyu de Xixón na Feria Internacional de Muestres d’Asturies 2024, dedicáu esti añu al proyeutu de Naval Azul, recibió un total de 100.898 visitantes, lo que supón un xorrecimientu del 57,27% con respeutu al añu caberu, cuando fueron 64.154. El día d’asistencia mayor de públicu al stand foi el del zarru de Feria, el domingu, con 8.989 persones.
El xuegu d’entrugues sobre’l conteníu del stand foi ún de los grandes atractivos del mesmu. Apurrióse un total de 5.061 premios a los acertantes, con un máximu diariu de 486 el 4 d’agostu, domingu primeru de la FIDMA.
Un total de 4.936 persones dieron la so valoración sobre’l stand na máquina dispuesta a tal efeutu na salida del mesmu. Ocho de cada diez dieron-y al ‘verde’, la valoración máxima.
La vicealcaldesa de Xixón y conceyala d’Economía, Emplegu, Turismu y Anovación, Ángela Pumariega, amosó la so “gran satisfaición poles cifres d’asistencia al stand del Conceyu, que demuestren que los xixoneses respondieron con un interés perfonderu a la decisión de dedicalu a un gran proyeutu de futuru pa la ciudá como ye Naval Azul. Eso motívanos y afálanos entá más a siguir trabayando pa que seya una realidá lo enantes posible. Anque de momentu teamos na fase urbanística, los visitantes del stand pudieron conocer lo que significa la economía azul y lo que representa pa Xixón, coles grandes posibilidaes económicas d’esti espaciu de collaboración públicu-privada, sobre manera tomando como referencia’l Parque Científicu Teunolóxicu”.
Destacó tamién Pumariega que “los visitantes del stand amosaron munchu interés por conocer los planes pa l’apertura al mar de El Natahoyo, y el percorríu hestóricu tamién foi mui comentáu y allabáu polos que contemplaron el percorríu espositivu. Y, por supuestu, miles de persones de toles edaes esfrutaron del xuegu de preguntes y l’audiovisual. Too ello fai que zarremos esta edición de la FIDMA con un éxitu rotundu”. Y añadió que “esto nun sedría posible ensin el llabor magníficu que desendolquen cadañu la Cámara de Comerciu de Xixón y toles persones que faen posible la Feria Internacional de Muestres d’Asturies, que, una vegada más, valtó’l so récord d’asistencia y con un éxito celebráu non sólo pol Ayuntamientu, sinon por tola ciudá y por toa Asturies”.
Susana Sela
This work is licensed under a Creative Commons Attribution 4.0 International License.
