Conseyería desanicia 16 places de profesores d’asturianu

22 Agostu, 2024

L’Asociación de Docentes d’Asturianu y Eonaviego (ADAE) denunció en xunetu la desapaición de 40 vacantes. Tres de la “corrección” de Conseyería, en Primaria desapaecen 13 vacantes y tres en secundaria, al tiempu qu’otres siete pasen a ser de media xornada

A entamos de xunetu yeren 40 les vacantes perdíes alvertíes pola asociación na rellación de necesidaes provisionales de docentes pal cursu 2024/2025. Tres de la llamada d’atención por parte d’ADAE, a mediaos del mesmu mes aportó la “corrección”, entá con 30 vacantes menos de lo necesario, lo que tamién s’alvirtió a Conseyería y a tolos sindicatos. Tres estos avisos, la convocatoria de places d’iniciu de cursu sal tovía con una deficiencia de 16 vacantes en comparación coles convocaes a entamos del cursu 23/24.

En Llingua Asturiana de Primaria desapaecen 13 vacantes y 7 amenorguen el so tiempu, pasando a media xornada. En Secundaria, son tres los puestos de trabayu desaniciaos.

ADAE insta a la Conseyería a que rectifique les previsiones y se convoquen les vacantes necesaries pa cumplir cola llexislación y la xurisprudencia vixente. El profesoráu que forma ADAE considera qu’esta situación “ye inaceptable” y camienta que “Trátase d’una estratexa d’aforru que tien tovía un coste mayor: l’incumplimientu de la normativa que permite al alumnáu d’Asturies que lo desee cursar l’asignatura d’ún d’estos dos idiomes, lo que suprime los sos drechos”.

Entantu, son dellos los escolinos que denuncien presiones, más o menos direutes, dende los sos cientros pa qu’escueyan otres asignatures porque “n’asturianu son pocos y va desapaecer l’asignatura”.

Nel Dos Santos