A la espera de que les alministraciones competentes (Principáu d’Asturies y Conceyu de Tapia) tomen decisiones sobre la mal llamada “mina d’oru más grande d’Europa”, la empresa minera miente y falta directamente a los vecinos de Tapia en prensa

La empresa minera que pretende estrayer oru en Tapia, Exploraciones Mineras del Cantábrico, filial de Black Dragon, yá cometió numberoses infracciones anantes inclusive d’entamar a operar, siendo apocayá despidíu’l so fundador y director como CEO d’otra empresa minera qu’opera en Bosnia n’atropando abondos problemes y retrasos, incluyendo mentires a los accionistes, problemes cola xusticia llocal por tratar de baltar un monte y un historial d’insultos públicos a quienes lu cuestionaben pola so xestión al mandu de la empresa.

Insultos tamién tuvo pa los vecinos de Tapia, a los qu’acusó n’un de los sos numberosos artículos pagos en prensa de “falta de audacia, d’arroxu, inacción y mieu al futuru”.

La rempuesta de los vecinos nun se fexo esperar “Faen gala de la so avezada prepotencia, sobeyosa y paternalista, vendiendo esti proyectu como la tabla de salvación que va sacamos de la probitú ya ignorancia na que consideren que vivimos. Por si nun s’enteraren, Tapia va tiempu que dexó de ser una aldega perdida de finales del sieglu XIX y mira al futuru con ganes, ensin mieos y valorando y protexendo lo que tien” respuenden dende la Plataforma Oro Non, que ca día que pasa tán más convencíos de qu’esti proyectu mineru en Tapia de ye una auténtica barbaridá y de que nun ye llegal nin vidable técnica nin medioambientalmente.

Llucía F. Marqués

This work is licensed under a Creative Commons Attribution 4.0 International License.