El Movimientu de Muyeres Llibres del Kurdistán (Tevgere Jinên Azad, TJA) denuncien l’asesinatu sistemáticu d’activistes y periodistes comprometíes con esti movimientu

Los ataques que’l gobiernu fascista del AKP-MHP tuvo llevando a cabu simultáneamente en cuatro partes del Kurdistán dende hai tiempu son la manifestación d’una fonda hostilidá escontra los llogros del pueblu kurdu, especialmente la llucha pola llibertá de les muyeres kurdes.

Nos últimos años aplicáronse polítiques de destrucción contra les muyeres kurdes, polítiques y activistes, per parte d’aliances paramilitares, sobro’l terrén facilitáu pol Gobiernu Rexonal del Kurdistán en Bashur. Como resultáu d’ello’l movimientu pola llibertá del pueblu kurdu TJA denuncia l’asesinatu de les sos collacies Jiyan Tolhildan, Roj Xabûr, Barîn Boten, Hevrîn Xelef, Nagihan Akarsel, Evîn Goyî, Yusra Dervêş, Lîman Şiwêş y Firat Tûma, “llucharon pola verdá y la llibertá y fueron asesinaes pol réxime fascista del AKP-MHP”.
Apocayá, les trabayadores de prensa kurdes Gülistan Alifaz y Héro Bahadîn fueron asesinaes de resultes d’un ataque con un dron armáu contra un vehículu en Sulaymaniyah, nel territoriu del Gobiernu Rexonal del Kurdistán. Gulistan, que lleva lluchando en munchos ámbitos como trabayadora de la prensa llibre dende 2000, nun yera namái una periodista, sinón tamién una trabayadora de la prensa que tresmitía abiertamente al mundu la llucha pola llibertá y la verdá de les muyeres kurdes. Los sicarios que prepararon el terrén y entamaron esta masacre y crime de guerra nes tierres del Kurdistán del Sur son siquier tan responsables d’estes elles como l’Estáu turcu que lo permite y afala.

Peshxan Ezîzî,  Sharife Muhameddi y Marisha Moradi, periodistes y activistes curdes activista en favor de les muyeres n’Irán, fueron condergaes va pocu a muerte por “pertenecer a grupos qu’empecipiaron un llevantamientu armáu contra’l gobiernu islámicu y que los sos dirixentes participaron na rebelión”. Les condergues a muerte y les execuciones convirtiéronse nel mediu d’Irán pa callar la oposición social, especialmente a les muyeres
“La filosofía de Jin Jiyan Azadî (Muyer, Vida, Llibertá), que resume la llucha pola llibertá de les muyeres kurdes y pola independencia del pueblu kurdu, convirtióse nuna gran esperanza pa tolos primíos” destaquen dende TJA, el movimientu de muyeres kurdes que ye una parte fundamental del movimientu de llibertá kurdu.

Llucía F. Marqués

This work is licensed under a Creative Commons Attribution 4.0 International License.