Llucía F. Marqués
Un aplausu a la coña de los quíxoles del Otero Team, ganadores del segundu premiu del Descensu Folclóricu del Nalón con una alegórica embarcación col so vecín Adrián Barbón comu protagonista
La máquina pita y anda ye’l nome de l’alegórica costrucción, lloa y allabancia del enclín madriliegu que carauteriza los gobiernos que carez Asturies. Nella, un presidente asturianu, “socialista” pa más datos, pásalo en grande en bona compaña de la presidenta madrileña más polémica, drechista y española, conocida por venceyar la llibertá a les cerveceries y dexar morrer vieyos ensin remordimientos.
Xuntos cabalguen una pita caleya, representación d’un AVE que nun lo ye y que furrula impulsada por trampes y engaños. En concreto, una panoya -nun tenemos claro de si hai equí alusión al Maizón principiegu- que por muncho que corra, la pita nun va algamar.
Igual que los asturianos cuerren tres de les promeses del so presidente, qu’enseña, suxeto pela caña del programa elleutoral, una oficialidá, unes meyores y una calidá de vida qu’una y otra vuelta ufre, mientres se mexa de risa sabiendo que nun vamos llegar a ello.
Maxistral.
This work is licensed under a Creative Commons Attribution 4.0 International License.
