El Gobiernu d’Asturies torna’l recursu de reposición presentáu polos ecoloxistes contra’l proyectu d’investigación minera, denomináu “Ástur A” y tramitáu por Asturmet Recursos, S. L. O. col que la empresa pretende esquizar la presencia de cobaltu, cobre, níquel, oru y plata n’una superficie de 217 cuadrícules mineres, afeutando a los conceyos de Llaviana, Piloña, Nava y Bimenes.

Esta autorización minera del Principáu, xenera pal vecinderu enormes impactos y menaies que van hipotecar el so futuru próximu, alvierten los ecoloxistes, qu’aporfien en que sedrá desaxeradamente dañible para la salú, la economía llocal y la redolada medioambiental.

Les actividaes estractives d’investigación, nun son d’escasu impactu y de tipu temporal, como pretenden vender la minera o’l Principáu y dellos conceyos. Amás, l’actividá investigadora ye l’entamu de l’actividá estractora cuando s’atopen recursos na zona, lo que supón un impactu importante y munches vegaes definitivu. Anque esos estudios revelaren qu’anguaño la estracción nun fuera rentable, en función de la evolución futura de la cotización internacional d’esos materiales, dicha esplotación sí podría pasar a selo, colo cual los estudios non yá son un peligru para agora, sinón para siempres, recalquen dende la CEA.

Esta parte yá autorizada pol Principáu, ye la primera d’un proyectu muncho más ambiciosu que va afectar tamién a los conceyos de Parres y llegando hasta Ponga. Va afectar a llugares tan emblemáticos como Peñamayor, Pozu Funeres, La Xamoca, el valle del río Infiernu, la Collada Moandi, Vizcares, área de La Pesanca, Sierra de les Aves, Collada Traslafuente…, sobro una superficie de 555 cuadrícules mineres.

“Nun tien sentíu l’autorización del llabor investigador ensin entrar a evaluar la admisibilidad ambiental y social de la esplotación extractiva-minera que busca enllantase na mesma zona. Rescampla qu’esta identificación de recursos mineros, promovio por una empresa privada, tien como oxetu la so estracción. Anque dende la Conseyería se diga otra cosa, nun se trata d’una investigación puramente científica” declararon dende la Coordinadora Ecoloxista d’Asturies, faciendo rescamplar que los Conceyos afectaos nunca avisaron a los vecinos del proyectu mineru de denguna de les maneres oficiales (web, bandu, notificación, etc) . 

Susana Sela

This work is licensed under a Creative Commons Attribution 4.0 International License.