Acordies los datos oficiales del Gobiernu d’Asturies na so web sobro contaminación atmosférica y calidá del aire Uviéu tien disparaos, per quintu día consecutivu, los niveles del canceríxenu bencenu.
Nel conceyu d’Uviéu son namás dos les estaciones que miden los valores de bencenu, un contaminante de nefastes consecuencies sobro la salú del que se sabe que produz cáncanu. N’una d’eses estaciones, la de Trubia, algamáronse ayeri valores de 22,2 µg/m3 neto que na Estación de Control de calidá del Aire de Ventanielles, que ta asitiada a más de 11 Km Trubia, lo que da idega de la estensión del problema. Los cuatro dias anteriores los valores fueron asemeyaos.
La Organización Mundial de la Salú encamienta nun esponese a denguna concentración d’esti hidrocarburu, yá que nun atopa dengún nivel de concentración de bencenu nel aire per debaxo del cual nun se prevean consecuencies adverses pa la salú, por cuenta del so altu potencial canceríxenu.
El bencenu ye un compuestu orgánicu potencialmente carcinoxénicu que, en siendo esneldáu y dempués d’esposiciones enllargaes, puede causar graves efectos sobro la salú humana, yá que afecta al sistema nerviosu central y a la normal producción de célules sanguínees, puede deteriorar el sistema inmunitariu y estropiar el material xenéticu celular, lo que de la mesma puede aniciar determinaos tipos de cáncanu (leucemia) asina comu malformaciones conxénites.
La estación de Trubia sigue presentando los peores valores de bencenu de toa Asturies, con una media añal de 2,7 µg/m³ el pasáu añu, ensin que se plantegara una revisión del Plan pal Amenorgamientu de los Niveles de Bencenu en Trubia.
Nel Dos Santos
This work is licensed under a Creative Commons Attribution 4.0 International License.
