La campaña d’Andecha Astur escontra la xentrificación y la turistificación de Cimavilla trunfa nes redes sociales, y nel propiu barriu xixonés pola so orixinalidá.

El llema de la campaña ta escritu en Vesre, la fala utilizao tradicionalmente pola xente del barriu xixonés de Cimavilla pa evitar ser entendios pola xente de fuera

Ayer martes Cimavilla alborecía estrada d’unos misteriosos cartelos, inintelixibles pa la gran mayoría de la xente, non solo foriatos, sinón asturianos de fuera del más míticu barriu xixonés. Sicasí, los playos -nomatu pol que se conoz a los moraores de Cimavilla- nun tuvieron problema dalu en pescanciar el so conteníu y coincidir con él. 

Esa yera precisamente la intención d’Andecha Astur al entamar una campaña dirixía n’esclusiva a los vecinos del barriu marineru, que carecen d’un seriu problema de turistificación y xentrificación del so llugar de residencia. Esti problema, llargamente denunciáu pola AAVV, ta teniendo consecuencies concretes sobre la so vida: encarecimientu de la vivienda, perda d’espacios comunes, xubía de precios, ruios, suciedá y, mui importante, la perda d’identidá d’un barriu que destacó siempre pol so calter.

D’ehí que, dientro de la so llinia de denuncia de la masificación turística indiscriminao d’Asturies qu’Andecha lleva desendolcando de magar los años noventa y qu’inclui la presentación de propuestes llegales concretes pa encarar el problema, la formación nacionaliega se dirixa especificamente a la xente d’esti barriu, poniendo l’acentu na urxencia de tomar midíes que garanticen la pervivencia de la so identidá y que frenen la espulsión de los vecinos del so propiu llugar de residencia. 

La orixinalidá de la campaña ta faciendo que trunfe nes redes, amás de tener una perbona acoyía peles cais de Cimavilla. 

Nel Dos Santos

This work is licensed under a Creative Commons Attribution 4.0 International License.