Nuna Asturies na que más del 40% de los menores viven en llares en riesgu de probitú ya esclusión social -datos de 2023-, con más de 200.000 asturianos viviendo na probitú, enfrentase a los costes d’entamu de cursu -800 de media- implica tener qu’escoyer pente que la reciella tea material escolar y que la familia coma curioso.
Que la educación oficial ye obligatoria nun lo pon naide en dubia, sinón qu’entruguen a tolos pas y mas que intentaron educar a los sos fios en casa, una opción perfechamente llegal na mayoría de los países desendolcaos y que nel estáu español desemboca ceo en denuncia xudicial ya intervención de l’asistente social -a nun ser que teas munches, munches perres pa escolarizar a distancia nun cientru priváu d’otru país-.
Que nun ye de baldre sábenlo cierto toles families qu’estos dies s’enfrenten a gastos mui perriba de la capacidá alquisitiva de munches d’elles. Los colexos ya istitutos son de baldre, cierto, pero nun lo son los llibros, el material escolar, el comedor nin les estraescolares, tan necesaries non solo pal desendolcu de los rapacinos sinón pa la conciliación familiar.
Les beques pa llibros ya nun lo son, tornaronse a cencielles nun sistema oficial de xestión de los llibros de segunda man que tradicionalmente xestionaben -y siguen faciéndolo cuando nun hai beques- les families; un sistema del que queden automáticamente escluyios, por casu, los rapacinos que repitan cursu, y qu’amás xenera desigualdaes na clas: non solo son llibros de segunda man, non siempres en bones condiciones, sinón que na mayoría los centros entréguense depués del entamu de cursu, marcando a los escolinos que pasen el primer mes ensin material. Eso si estudies na pública, claro, na privada la beca (pública) ye en metálico.
Los que nun tienen beques enfréntense a factures que superen fácilmente los 300 euros, más cuantu mayor seya’l cursu, namás polos llibros, face-y cuenta que na mayoría de les asignatures el llibru de testu pasa de los 50€. Pero los gastos son muncho más: los datos del añu pasáu apunten a que’l gastu de media por rapacín foi de 824 euros pa entamar el cursu; garren una familia con tres fios y multipliquen.
¿Teneis ya la rempuesta a la entruga del titular? ¿Ye de baldre la educación nesti país?
Llucía F. Marqués
This work is licensed under a Creative Commons Attribution 4.0 International License.
