Andecha Astur foi la única que denunció la neglixencia naquel momentu, obligando nos solo a revisar tolos sistemes de seguranza en materia de minería n’Asturies sinón que dexó nidio la esistencia de responsables na empresa y nes direiciones sindicales

El 31 d’agostu de 1995, 14 mineros perdieron la vida nel Pozu Nicolasa n’Ablaña, Mieres. Un españíu de grisú a les 3:15 de la nueche, a 400 metros de fondura nos soninveles de la capa ocho de la quinta planta foi la causante direuta l’acidente. La causa indirecta foi la deficiencia de los sistemes de seguranza, con responsables direutos d’una traxedia que pudo evitase.

Andecha Astur foi entós la única organización que defendió dende un entamu la necesidá de depurar les responsabilidaes llegales d’esti acidente, presentando una denuncia a los seyes díes del socesu, ya impidiendo que’l casu fora zarráu darréu cola so presencia nel xulgáu.

Demientres más de cincu años Andecha Astur llevó pelos tribunales a altos cargos d’Hunosa, forciando a sumase a la denuncia a los sindicatos SOMA-UGT y CC.OO. Esto sindicatos, de man non solo s’inhibieren sinón que ridiculizaron y menaciaron a Andecha Astur, presionando a les families de les víctimes pa qu’aceutaren en silenciu les indemnizaciones y quitaren les demandes xudiciales. 

Pesi a que a la fin la xusticia nun castigó a los responsables, tres de la llarga batalla llegal quedó nidio pa los asturianos qu’aquelles muertes yeren evitables, marcando un anantes y un dempués na minería asturiana y forciando a camudar les midíes de seguranza nes mines.

29 años más tardi, ya ensin mines n’Asturies, mércase carbón a esplotaciones allugaes a miles de km d’equí, nes que nun hai midíes de seguranza y les condiciones llaborales son tan llacerioses comu pa que faigan más rentable un carbón que viaxa pel mar que’l que s’estrayía al par de casa. ¿Quién s’alcuerda ya de la llucha minera? ¿Quién remembra Nicolasa?.

Llucía F. Marqués

This work is licensed under a Creative Commons Attribution 4.0 International License.