L’Asociación en defensa l’asturianu, n’Ast, denuncia que la cadena de llibreríes fexo desapaecer la so estaya asturiana y afala a mercar llibros n’establecimientos respetuosos pa col nuesu idioma
Na Casa del Llibru de Xixón pues alcontrar, aparte de llibros n’español, estayes d’inglés, francés, italiano, alemán, portugués ya incluso un par de manuales de xaponés y coreano. Nun hai estaya d’asturianu.
La multinacional Planeta, a la que pertenez esta cadena de llibreries, tenía fasta va unos meses una estaya -piquiñina y escasa, pero ehí taba- dedicada a los llibros n’asturianu. Sicasí, siguiendo la política de la empresa, recientemente decidieron desaniciar esi espaciu, reduciendo la presencia de la nuesa llingua a, lliteralmente, cuatro llibros arrequexaos na estantería de “Gijón”, que previsiblemente desapaecerán en cuantes que se vendan esos cuatro exemplares.
“Hai n’asturies llibreríes abondes nes qu’alcontrar llibros n’asturianu, o como mínimu, llibreríes nes que pueden encargase, casu de nun tenelos” destaquen desde N’Ast, encamentando a tolos llectores que merquen los sos llibros “non solo n’asturianu, sinón cualisquier otru que quieran mercar, nes llibreríes que se muestren respetuoses cola nuesa llingua, dexando les perres meyor n’aquellos llibreros comprometios col asturianu que’n multinacionales que lu disprecien”.
Dalgunes de les llibreríes onde se pueden mercar llibros n’asturianu son:Llibrería Trabe, La Llocura Llibrería-Café Llibrería Matadero Uno, Llibrería La Pilarica, Llibrería Sol, , Llibrería Casona, La Revoltosa, libros y café, Llibrería Amez, Llibrería La Buena Letra, Llibrería Paradiso, Llibrería La Habitación Propia…
Susana Sela
This work is licensed under a Creative Commons Attribution 4.0 International License.
