La risible sanción impuesta pola Confederación Hidrográfica del Cantábricu al Conceyu Carreño por siguir colos arramaos d’agües residuales de delles viviendes ensin saneamientu al regueru Noval, qu’acaba na sablera de la Pregona, indigna a vecinos y ecoloxistes.
360 euros ye lo que tuvo que pagar nesta ocasión el Consistoriu, que yá pagara enantes otres multes pol mesmu motivu.
Pa La Coordinadora Ecoloxista, que denunciara en repitíes ocasiones eses infracciones, “estes risibles multes nun van obligar a que’l Conceyu adopte les midíes necesaries para arreglar esti problema ambiental y, más bien al contrariu, demuéstrase la tolerancia que tien la Confederación Hidrográfica del Cantábricu con dichos arramaos residuales”, afalando la so continuidá.
Los arramaos d’agües residuales son apreciables visible y olfativamente polos que se bañen na sablera y prodúcense de forma frecuente.
Esta problemática de la calidá de les agües ta afectando non solo al ociu na temporada de baños, sinón tamién a los llabores de pescadores y a les distintes actividaes esportives que se realicen nes proximidaes de la sablera.
Amás, de lo más importante, los difícilmente reversibles daños ambientales, dándose una degradación de la redolada natural por culpa de la neglixencia y la tolerancia de les autoridaes responsables de curialo y de xixilar la so estabilidá. “Esa actitú, ye cada vez más indolente y suicida al nun tomar les midíes afayadices pa desaniciar la contaminación tres años y más años d’alvertencies” aportunen dende la Coordinadora.
Nel Dos Santos
This work is licensed under a Creative Commons Attribution 4.0 International License.
