La multinacional, que se vende como una gran oportunidá llaboral p’Asturies, reserva pa los asturianos namás 150 puestos, los de menor nivel, trayendo otros 250 emplegaos de fuera

La macronave del xigante estauxuniense del comerciu on line entamó a furrular esti llunes con cien trabayadores, una cuarta parte de los que tarán trabayando allí a finales de mes y namás una piqueña porción de los 1.500 que prometen contratar nos prósimos años. 

N’apertura, monteres picones, gaites, pintaes de “puxa”, bollos preñaos y un horru por llogu, too mui guapo y mui asturiano, un detalle a agradecer, lo mesmo que los salarios, bastante aceutables en principiu, comparando col mercáu llaboral asturianu d’anguañu.

La empresa enllénase amás la boca anunciando que “cerca del 50% de los emplegaos sedrán asturianos”. O dicho d’otra manera, más de la metá de los trabayadores d’Amazon en Siero vienen “importaos” d’otros llugares. De fechu, la ufierta de trabayu llanzada pola multinacional foi de 150 persones de les 400 qu’anicialmente componen la plantiya.

Na ufierta espublizada pa esos 150 emplegos especifícase la emportancia de la fuercia física “ya que se tendrán que mover paquetes d’hasta 15 kilos”. Los trabayos a realizar, especifiquen, consisten en recibir, revisar, ordenar y almacenar tolos productos; recoyer, empaquetar y unviar los pidios; utilizar un escáner; y xestionar la gama completa de productos d’Amazon, “incluyendo el alcool y productos porcinos”, concreten, por si n’Asturies hubiere problemes relixosos con ello. Resumiendo, que básicamente, la prautica totalidá de los 150 emplegos qu’ufren a los asturianos son los de baxu nivel, mozos d’almacén, empaquetaores, clasificadores… los emplegos de más valir resérvense pa la xente que vien d’afuera, 250 por agora.

Llucía F. Marqués

.

This work is licensed under a Creative Commons Attribution 4.0 International License.