N’Asturies hai censaes más de 670.000 viviendes, acordies el censu que fae d’elles l’Istitutu Nacional d’Estadística, l’INE. D’elles, 100.646 tan direutamente vacíes dafechu, nun teniendo siquiera lluz contratao. Otres 27. 516 utilícense como muncho 30 díes al añu. Finalmente, son 121.548 les que s’utilicen esporádicamente, como muncho tres meses al añu. En total, son cerca de 250.000 les viviendes asturianes a les que nun se da usu avezáu, ya seya porque tan abandonaes, son segundes residencies de mui baxu usu o tan destinaes al turismu. 

El datu que se utiliza pa valorar l’usu d’una vivienda ye’l so consumu llétricu, munches d’estes cases nun tienen contratu de lluz y otres tiénenlu, pero’l so consumu ye l’equivalente al de menos de 15 díes de lletricidá. Los pueblos abandonaos dafechu nun entren nestos cálculos, polo que la cifra podría ser bultablemente mayor.

Por conceyos, los que más viviendes desaprofitaes tienen -la estadística nun considera les llocalidaes con menos de 2.000  moraores- son Ayer (38’9%), Ribeseya (21,4%), Llanes (20,8%) y Gozón (19,6%). Otros conceyos turísticos en situación problemática son los de Cangues col porcentaxe de viviendes consideraes d’usu mínimu del 14%, o Cuideiru y Cabrales, que ronden el 13%. La situación ye menos grave, pero temién esmolecedora, nes grandes ciudaes, como Uviéu  qu’algama les 36.951 viviendes nestes circustancies, ello ye, cerca d’una de cada tres, o Xixón, con el 28.806 de les sos 148.955 viviendes vacies o infrautilizaes, ello ye, más del 25%. Falamos de ciudaes nes que la media de los precios de los alquileres cuadriplicó nos caberos años y onde la población nun alcuentra manera de topar residencia por menos del 80% del so salariu.

Nel Dos Santos

This work is licensed under a Creative Commons Attribution 4.0 International License.