Anicialmente nun van producise despidos, sinón que la empresa espera que cuasi 800 persones s’apunten voluntariamente a un ERE
La compañía de telecomunicaciones frutu de la fusión de Orange y MásMóvil, dueña de la asturiana Telecable anunció va pocu un espediente de regulación de emplegu (ERE) “de calter voluntariu” pa 795 trabayadores, ello ye, alrodiu’l 9,5% de les alredor de 8.400 persones qu’integren anguañu la so plantiya. La idega que la empresa treslladó, por conceyu virtual, a los trabayadores ye que’l recorte d’emplegu, “xeneráu poles duplicidaes organizatives darréu la fusión de les dos empreses” va ser voluntariu, ensin especificar entá les condiciones que van facer que cuasi 800 persones decidan dexar el so trabayu voluntariamente.
La mesa de negociación del ERE tará costituyía pal 14 d’esti mes a más tardar y la compañía cuenta con aportar a un alcuerdu a mediaos d’ochobre; de magar entós abriráse’l procesu pa quien quiera apuntase al plan de salies voluntaries de la empresa, que dirán acompangaes, diz la empresa, d’un “bon plan de recolocación”. Ye de suponer que, casu nun se cubrir les places de despidu voluntariu pasaráse al despidu forciosu.
L’ERE nun va afeutar les tiendes nin al “call center” que’l grupu tien nel polígono del Espíritu Santu, n’Uviéu, con cuasi mil emplegaos.
Alberto Rodríguez
This work is licensed under a Creative Commons Attribution 4.0 International License.
