“Muncho por avanzar” ye’l llema pa una fecha na que la organización nacionaliega vindica comu una xornada de llucha y non como folixa erma de conteníu

La cita ye a les doce y media en La Felguera, al pie del monumentu que rinde homenaxe a Belarmino Tomás na so ciudá natal. La xida d’escoyer esti llugar concretu ye venceyar la llucha nel momentu actual cola qu’entós llevó a los asturianos a declarase soberanos, enfrentándose al facismu faciéndose dueños del so futuru. 

“Asturies ta quedando atrás en tolos indicadores sociales y económicos. Lleva décades quedando atrás gracies a les polítiques del Estáu español p’Asturies que, cola complicidá y collaboración del “Principado”, tan destruyendo tol texíu socioeconómicu-cultural d’Asturies, y llevándomos a una situación d’auténticu xenocidiu, con decenes de miles d’asturianos obligaos a emigrar añu ente añu y con cientos de miles resistiendo en condiciones de paru y precariedá llaboral y social. Tamos nun momentu nel que los asturianos tienen que decidir si permitir el desaniciu d’Asturies o alzar la cabeza y reclamar pa nosotros el drechu d’escoyer el nuesu futuru, garantizar la nuesa sobrovivencia como Pueblu y llevar alantre’l necesariu procesu de recostruición nacional y social que fine cola situación d’anguañu” declaró Llucía Fernández, que sedrá la vocera d’Andecha Astur nesti actu.

La organización llamentó tamién la dificultá pa conseguir la xunidá d’aición pa esti díi, ante’l desenfotu xeneralizáu que lleva a la inaición nun díi tan importante o a convertilu nuna folixa valera de conteníu. Recuerden que la so man ta tendía a toes aquelles organizaciones que tean como oxetivu la reivindicación de la nación asturiana y los drechos sociales de los asturianos, comencíos de que “el camín pa superar la situación que carecemos ye algamar una xunidá que permita finar col monopoliu de los partíos sucursalistes nel nuesu país, y el so llabor de caltener a Asturies en situación de dependencia y precariedá, al serviciu de los intereses de Madrí”.

Nel Dos Santos

This work is licensed under a Creative Commons Attribution 4.0 International License.