La Fundación Almastur entama en Garbelles (Caldones) un ciclu de nueve charres que toquen temes perestremaos de gran interés, cientraos na cultura asturiana
La Fundación Almastur ñació col envíes d’enfotase na defensa, estudiu y espardimientu de la cultura asturiana. Nesi sen, les ocho ponencies entamaes por esta entidá, presidida por Carlos Rubiera, toquen dellos temes perinteresantes que s’averen a lo que ye Asturies dende estremaes perspeutives, a cual más interesante.
Toles conferencies tendrán soporte audiovisual y dellos intermedios musicales y/o poéticos en vivo alusivos al tema, a cargu del cantautor y escritor Carlos Rubiera y al finar ca conferencia fadráse un coloquiu y, darréu, un pinchéu-espicha nel Llagar de Garbelles (xusto embaxo la Sala Almastur).
Les xornaes arranquen l’once d’ochobre y la Cultura de la Sidre sedrá la protagonista nel primer vienres, baxo’l títulu “La Cultura de la Sidra, patrimoniu cultural inmaterial de la humanidá”. El ponente nesti casu sedrá l’antropólogu y profesor de la UNED, Xuan de Con.
El mes de payares el biólogu y naturópata Tomás J. Villalta falarános de les “Plantes medicinales na tradición asturiana”nuna charra que tendrá llugar el vienres 8 de payares.
El 13 d’avientu los “Escritores del Surdimientu” tendrán el so espaciu de la man de Xosé Ramón Iglesias Cueva, profesor de lliteratura y Secretariu de l’Academia de la Llingua Asturiana.
Entrando ya en xineru, el día 17 falaráse de “Horros y paneres, orixen, evolución y perspectives de futuru”, col etnógrafu de la Fundación Belenos Astur Paredes.
Xuan Pedrayes, arquitectu, dirixirá la ponencia del vienres 14 de febreru, “Les Poles asturianes. Del
policentrismu a la conurbación” y xusto un mes depués “El nuevu canciu Astur, los
pioneros de la nueva música asturiana” tendrán el so momentu col musicólogu Llorián García Flórez.
El vienres 7 d’abril Xosé Lluis Carmona, profesor d’Historia Moderna y Contemporánea de la UNED – Asturies, traerá’l tema “La Ilustración asturiana, Xovellanos y los oríxenes del asturianismu”
“Cuadonga ya’l Reinu. Una revisión crítica de la Historia cuntada” sedrá’l tema espuestu por Margarita Fernández Mier, caderalga d’Historia Medieval de la Universidá d’Uviéu y esti primer ciclu presllaráse cola ponencia “La emigración asturiana, l’éxodu de la necesidá, qu’espondrá l’hestoriador Faustino Zapico.
P’asistir a esti ciclu de conferencies con espicha, hai menester apuntase primero y aportar un donativu a la Fundación, nesti casu, pídense 22 € por persona y sesión.
Llucía Fernández
This work is licensed under a Creative Commons Attribution 4.0 International License.
